بلوچستان بجٹ 2026-27: معیشت، صحت، انفراسٹرکچر اور گورننس کے لیے بڑے فنڈز مختص

حکومت بلوچستان نے بجٹ 2026-27 میں مختلف شعبوں کے لیے اہم مالیاتی اعلانات کیے ہیں جن کا مقصد معاشی ترقی، بنیادی ڈھانچے کی بہتری، سماجی بہبود اور ڈیجیٹل گورننس کو فروغ دینا ہے۔

معاشی امور کے لیے 85.598 ارب روپے مختص کیے گئے ہیں جن سے نوجوانوں کے لیے روزگار کے مواقع، ڈیجیٹل معیشت اور پاک ایران سرحدی تجارت کو بہتر بنایا جائے گا۔

کمیونٹی سہولیات کے لیے 55.058 ارب روپے رکھے گئے ہیں جن سے رہائشی منصوبے، صاف پانی، سیوریج اور سڑکوں کی بہتری شامل ہے۔

ماحولیاتی تحفظ کے لیے 1.048 ارب روپے مختص کیے گئے ہیں جبکہ زرعی شعبے کی بہتری اور غذائی تحفظ کے لیے مجموعی طور پر 85.6 ارب روپے رکھے گئے ہیں۔

خوراک کی فراہمی اور تجارتی نظام کے لیے 3.765 ارب روپے مختص کیے گئے ہیں۔ صنعتی ترقی کے لیے 13.400 ارب روپے جبکہ انفراسٹرکچر کے لیے 22.617 ارب روپے رکھے گئے ہیں۔

صحت کے شعبے کے لیے 73.992 ارب روپے مختص کیے گئے ہیں جن سے طبی سہولیات بہتر بنائی جائیں گی۔

سماجی بہبود اور خواتین و کمزور طبقات کی معاونت کے لیے 15.14 ارب روپے رکھے گئے ہیں۔ عوامی خدمات، ای گورننس اور انتظامی بہتری کے لیے 270.532 ارب روپے مختص کیے گئے ہیں۔

امن و امان اور سیکیورٹی کے لیے 107.992 ارب روپے رکھے گئے ہیں جن سے جدید آلات اور سہولیات فراہم کی جائیں گی۔

حکومت کے مطابق یہ بجٹ بلوچستان کو ترقی، شفافیت اور خوشحالی کی جانب لے جانے کے لیے تیار کیا گیا ہے۔