وزیراعلیٰ بلوچستان میر سرفراز بگٹی کا گرلز کیڈٹ کالج کوئٹہ کا دورہ، 12 ملین روپے گرانٹ کا اعلان
وزیراعلیٰ بلوچستان میر سرفراز بگٹی نے کور کمانڈر بلوچستان لیفٹیننٹ جنرل راحت نسیم احمد خان کے ہمراہ گرلز کیڈٹ کالج کوئٹہ کا دورہ کیا، جہاں انہوں نے جدید تدریسی نظام، نظم و ضبط کو سراہتے ہوئے کالج کے لیے 12 ملین روپے گرانٹ کا اعلان کیا۔
کوئٹہ: وزیراعلیٰ بلوچستان میر سرفراز بگٹی نے کور کمانڈر بلوچستان لیفٹیننٹ جنرل راحت نسیم احمد خان کے ہمراہ گرلز کیڈٹ کالج کوئٹہ کا دورہ کیا، جہاں انہوں نے مختلف تدریسی شعبوں، فیکلٹیز اور تعلیمی سہولیات کا معائنہ کیا۔ اس موقع پر کالج کے جدید تدریسی نظام، مثالی نظم و ضبط اور طالبات کی کارکردگی کو سراہا گیا۔
وزیراعلیٰ نے خطاب کرتے ہوئے کہا کہ گرلز کیڈٹ کالج کوئٹہ پاکستان کی مثالی اور معیاری درسگاہ ہے اور یہاں زیر تعلیم طالبات ملک کی بہترین سفیر ہیں۔ انہوں نے طالبات پر زور دیا کہ وہ جس شعبے میں بھی جائیں، بلا جھجھک پاکستانیت کا پرچار کریں کیونکہ ریاست پاکستان ہر شے سے مقدم اور عزیز ہے۔
انہوں نے کہا کہ جس نے ریاست سے محبت کی اللہ تعالیٰ نے اسے عزت دی جبکہ ریاست سے غداری کرنے والے ہمیشہ رسوا ہوئے۔ ان کا کہنا تھا کہ تصور اور حقائق میں فرق کو سمجھنا اور سچائی تک پہنچنا ناگزیر ہے کیونکہ ریاست پاکستان کے خلاف منظم پروپیگنڈا کیا جا رہا ہے۔
میر سرفراز بگٹی نے کہا کہ بعض جامعات میں قوم پرستی کی آڑ میں قائم کونسلز معاونت کے نام پر معصوم طلبہ کو گمراہ کرتی ہیں، اس لیے نوجوانوں کو ایسے عناصر سے دور رکھنا ضروری ہے۔ انہوں نے کہا کہ ریاست مخالف عناصر بچیوں کو خودکش حملوں کے لیے استعمال کرنے کی کوشش کر رہے ہیں، جو بلوچ روایات، اقدار اور معاشرتی اصولوں کے سراسر منافی ہے۔
وزیراعلیٰ نے کہا کہ بلوچستان حکومت طلبہ و طالبات کے لیے ہارورڈ اور آکسفورڈ سمیت عالمی معیار کی جامعات کے دروازے کھولنے کے لیے اقدامات کر رہی ہے تاکہ نوجوانوں کو بہترین تعلیمی مواقع میسر آ سکیں۔
انہوں نے طالبات سے عہد لینے کی اپیل کی کہ وہ مستقبل میں جس شعبے سے بھی وابستہ ہوں، ریاست پاکستان کی مثبت نمائندہ اور پاکستانیت کی سفیر بن کر ملک کا نام روشن کریں۔
اس موقع پر وزیراعلیٰ بلوچستان نے گرلز کیڈٹ کالج کوئٹہ کے لیے 12 ملین روپے کی خصوصی گرانٹ کا اعلان بھی کیا۔ انہوں نے کہا کہ وہ ذاتی طور پر کالج کی سرپرستی کریں گے اور اسے دنیا کے مثالی تعلیمی اداروں میں شامل کرنے کے لیے ہر ممکن تعاون فراہم کیا جائے گا۔
Keywords : Girls Cadet College Quetta, Sarfraz Bugti, Education in Balochistan, Rs.12 Million grant
Related News
