حکومتِ بلوچستان کا غیر لائسنس یافتہ اور غیر معیاری چائلڈ نرسریوں کے خلاف سخت کریک ڈاؤن کا فیصلہ

رپورٹ: سیدہ نتاشا

حکومتِ بلوچستان نے صوبے بھر میں قائم غیر لائسنس یافتہ اور غیر معیاری چائلڈ نرسریوں کے خلاف سخت کریک ڈاؤن کا فیصلہ کر لیا ہے۔ اس فیصلے کا مقصد بچوں کے تحفظ کو یقینی بنانا اور والدین کے اعتماد کا ہر صورت میں تحفظ کرنا ہے۔
صوبائی وزیر صحت بخت محمد کاکڑ نے کوئٹہ میں قائم ایک چائلڈ نرسری میں بچے کی تبدیلی کے سنگین اور افسوسناک واقعے کا نوٹس لیتے ہوئے اعلیٰ سطحی تحقیقات کا حکم دے دیا ہے۔ انہوں نے کہا کہ اس حساس معاملے کی شفاف اور غیر جانبدار تحقیقات کے لیے کیس بلوچستان ہیلتھ کیئر کمیشن کے سپرد کر دیا گیا ہے۔

صوبائی وزیر صحت کے مطابق بچے کی شناخت اور تمام حقائق سامنے لانے کے لیے ڈی این اے ٹیسٹ کے ذریعے جانچ کا بھی حکم دیا گیا ہے تاکہ متاثرہ خاندان کو بروقت انصاف فراہم کیا جا سکے اور کسی قسم کا ابہام باقی نہ رہے۔
بخت محمد کاکڑ نے واضح کیا کہ غیر رجسٹرڈ اور غیر معیاری چائلڈ نرسریوں کے خلاف زیرو ٹالرنس پالیسی پر سختی سے عملدرآمد کیا جائے گا۔ انہوں نے کہا کہ بچوں کے تحفظ سے متعلق کسی بھی قسم کی کوتاہی برداشت نہیں کی جائے گی اور والدین کے اعتماد کو ٹھیس پہنچانے والوں کے خلاف بلاامتیاز کارروائی عمل میں لائی جائے گی۔
انہوں نے متعلقہ حکام کو ہدایت کی کہ صوبے بھر میں قائم تمام چائلڈ نرسریوں کی جامع جانچ پڑتال کی جائے اور لائسنسنگ کے عمل کو تیز کیا جائے تاکہ صرف وہی ادارے کام کر سکیں جو مقررہ معیار اور قوانین پر پورا اترتے ہوں۔ صوبائی وزیر صحت نے خبردار کیا کہ قوانین کی خلاف ورزی کے مرتکب نرسری مالکان کے خلاف سخت قانونی کارروائی کی جائے گی اور کسی قسم کی رعایت نہیں برتی جائے گی۔

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands