بلوچستان میں صنفی بنیاد پر تشدد کے انسداد کے لیے کثیر شعبہ جاتی رابطہ نظام کا آغاز

کوئٹہ: محکمہ ترقی نسواں بلوچستان (ویمن ڈویلپمنٹ ڈیپارٹمنٹ) نے اقوام متحدہ کے ادارے یو این ایف پی اے اور اسٹرینتھننگ پارٹیسپیٹری آرگنائزیشن (ایس پی او) کے تعاون سے بلوچستان میں صنفی بنیاد پر تشدد (جی بی وی) کی روک تھام اور متاثرین کو معاونت کی فراہمی کے لیے ملٹی سیکٹورل کوآرڈینیشن میکنزم (ایم ایس سی ایم) کا آغاز کر دیا۔

اس اقدام کا مقصد صوبے بھر میں صنفی بنیاد پر تشدد کی روک تھام اور اس کے متاثرین کو بہتر خدمات کی فراہمی کے لیے مختلف اداروں کے درمیان مؤثر رابطہ اور تعاون کو مضبوط بنانا ہے۔ اس کے ذریعے متاثرہ خواتین اور دیگر متاثرین کے لیے معاونت کے نظام کو مزید مؤثر اور مربوط بنانے کی کوشش کی جائے گی۔

افتتاحی تقریب میں حکومت بلوچستان کے نمائندوں، اقوام متحدہ کے مختلف اداروں، سول سوسائٹی تنظیموں اور ترقیاتی شراکت داروں نے شرکت کی اور صنفی بنیاد پر تشدد کے خاتمے کے لیے مشترکہ اور مربوط اقدامات کی ضرورت پر زور دیا۔ شرکاء نے اس عزم کا اظہار کیا کہ خواتین اور لڑکیوں کے لیے محفوظ ماحول کی فراہمی اور تشدد سے پاک معاشرے کے قیام کے لیے باہمی تعاون اور مربوط کوششوں کو مزید فروغ دیا جائے گا۔