حکومت بلوچستان اور وزارتِ پیٹرولیم کا لو بی ٹی یو گیس کو قابلِ استعمال بنانے کے لیے فریم ورک تیار کرنے پر اتفاق

کوئٹہ: حکومت بلوچستان اور وزارتِ پیٹرولیم نے صوبے میں لو بی ٹی یو گیس کے ذخائر کو مؤثر انداز میں قابلِ استعمال بنانے اور ان سے معاشی فوائد حاصل کرنے کے لیے جامع فریم ورک تیار کرنے پر اتفاق کر لیا ہے، جس سے صنعتی ترقی، توانائی کی پیداوار اور معاشی سرگرمیوں کے فروغ کی نئی راہیں کھلنے کی توقع ہے۔

یہ فیصلہ وفاقی وزیر پیٹرولیم علی پرویز ملک اور وزیر اعلیٰ بلوچستان میر سرفراز بگٹی کی مشترکہ صدارت میں منعقدہ ایک اعلیٰ سطحی اجلاس میں کیا گیا، جس میں وفاقی اور صوبائی حکام نے شرکت کی۔

اجلاس میں وزارتِ پیٹرولیم اور حکومت بلوچستان کے نمائندوں پر مشتمل ایک ورکنگ گروپ تشکیل دینے کا فیصلہ کیا گیا جو لو بی ٹی یو گیس کو قابلِ استعمال بنانے کے لیے درکار ریگولیٹری اور ادارہ جاتی فریم ورک تیار کرے گا۔ ورکنگ گروپ جولائی کے اختتام تک اس حوالے سے جامع تجاویز پیش کرے گا۔

اجلاس میں فیصلہ کیا گیا کہ سوئی اور مشرقی و مغربی ڈیرہ بگٹی کے علاقوں میں موجود لو بی ٹی یو گیس کو سستی بجلی کی پیداوار، کھاد سازی اور تجارتی و صنعتی سرگرمیوں کے فروغ کے لیے استعمال میں لایا جائے گا۔ وزارتِ پیٹرولیم اور متعلقہ ریگولیٹری اداروں نے منصوبے کے لیے فیلڈ ڈویلپمنٹ منظوریوں اور ٹرانسپورٹیشن لائسنسوں کے اجرا میں تعاون کی یقین دہانی کرائی۔

وفاقی وزیر پیٹرولیم علی پرویز ملک نے کہا کہ بلوچستان کے قدرتی وسائل سے حاصل ہونے والے فوائد مقامی آبادی تک پہنچانا حکومت کی اولین ترجیح ہے، جبکہ کلچاس ڈرلنگ اور زنک ہیڈ منصوبوں کو فعال بنانے کے لیے فوری اقدامات کی ہدایات بھی جاری کر دی گئی ہیں۔

وزیر اعلیٰ بلوچستان میر سرفراز بگٹی نے کہا کہ لو بی ٹی یو گیس کو تجارتی بنیادوں پر قابلِ استعمال بنانے سے بلوچستان میں معاشی ترقی اور صنعتی خوشحالی کے نئے مواقع پیدا ہوں گے۔ انہوں نے کہا کہ اس اقدام سے سوئی سمیت مشرقی اور مغربی ڈیرہ بگٹی میں صنعتی ترقی کے ایک نئے دور کا آغاز ہوگا اور روزگار کے مواقع پیدا ہونے کے ساتھ سرمایہ کاری میں بھی اضافہ ہوگا۔

Keywords : Low BTU Gas, Energy Development, Industrial Growth, Balochistan Economy