بلوچستان میں مال بردار گاڑیوں کی محفوظ آمدورفت کے لیے کانوائے سسٹم متعارف کرانے کا فیصلہ

کوئٹہ: بلوچستان حکومت نے صوبے کی شاہراہوں پر مال بردار گاڑیوں کی محفوظ نقل و حرکت یقینی بنانے کے لیے جلد کانوائے سسٹم متعارف کرانے کا اعلان کیا ہے۔

اس بات کا اعلان ایڈیشنل چیف سیکرٹری (داخلہ) حمزہ شفقات اور کمشنر کوئٹہ شہزیب خان کاکڑ نے کوئٹہ چیمبر آف کامرس اینڈ انڈسٹری میں آل بلوچستان بزنس الائنس اینڈ ایکشن کمیٹی کے عہدیداروں اور کاروباری و ٹرانسپورٹر برادری کے نمائندوں سے ملاقات کے دوران کیا۔

حکام نے کہا کہ صوبے کی شاہراہوں پر مال بردار گاڑیوں، مسافر بسوں اور شہریوں کے جان و مال کا تحفظ حکومت کی اولین ترجیح ہے۔ انہوں نے بتایا کہ تفتان بارڈر سے کوئٹہ اور ملک کے دیگر حصوں تک سامان لے جانے والی گاڑیوں کی محفوظ آمدورفت کے لیے جلد کانوائے سسٹم نافذ کیا جائے گا۔

اجلاس میں کاروباری اور ٹرانسپورٹر برادری کے نمائندوں نے شاہراہوں پر مال بردار ٹرکوں، ایل پی جی باؤزرز اور دیگر گاڑیوں پر حملوں، ڈکیتیوں، گاڑیوں کو نذرِ آتش کرنے اور پلوں سمیت بنیادی ڈھانچے کو نقصان پہنچانے کے بڑھتے ہوئے واقعات پر تشویش کا اظہار کیا۔ انہوں نے حکومت پر زور دیا کہ تاجروں، درآمد کنندگان، برآمد کنندگان، ٹرانسپورٹرز اور مسافروں کے تحفظ کے لیے مزید مؤثر اقدامات کیے جائیں۔

ایڈیشنل چیف سیکرٹری داخلہ حمزہ شفقات، کمشنر کوئٹہ شہزیب خان کاکڑ اور ڈپٹی کمشنر کوئٹہ مہراللہ بادینی نے یقین دلایا کہ قومی شاہراہوں پر سکیورٹی مزید مؤثر بنانے کے لیے پاکستان آرمی، فرنٹیئر کور (ایف سی) اور اینٹی ٹیررازم فورس (اے ٹی ایف) کے تعاون سے اقدامات کیے جا رہے ہیں، تاکہ عوام کا اعتماد بحال ہو اور ٹرانسپورٹ و تجارتی سرگرمیاں بلا رکاوٹ جاری رہ سکیں۔

حکام نے حالیہ واقعات میں جاں بحق افراد کے لواحقین کو معاوضے کی ادائیگی کا عمل تیز کرنے کی بھی یقین دہانی کرائی اور تمام متعلقہ فریقوں پر زور دیا کہ وہ صوبے میں امن و امان اور محفوظ سفری ماحول کی بحالی کے لیے مشترکہ کردار ادا کریں۔

 

Keywords : Balochistan, Convoy System, Highway Security, Cargo Transport

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands