بلوچستان میں ریسٹورنٹس پر 4 فیصد سیلز ٹیکس کے نفاذ کے لیے بی آر اے کی مہم تیز

کوئٹہ: بلوچستان ریونیو اتھارٹی (بی آر اے) نے بلوچستان سیلز ٹیکس آن سروسز ایکٹ 2015 کے تحت ریسٹورنٹس اور دیگر فوڈ سروس فراہم کرنے والے کاروباروں پر عائد 4 فیصد نظرثانی شدہ سیلز ٹیکس کے نفاذ کو یقینی بنانے کے لیے آگاہی اور نگرانی مہم تیز کر دی ہے۔

ترجمان کے مطابق یہ مہم وزیراعلیٰ بلوچستان میر سرفراز بگٹی کے وژن، صوبائی وزیر خزانہ میر شعیب نوشیروانی کی رہنمائی اور چیئرمین بلوچستان ریونیو اتھارٹی عبداللہ خان کی ہدایات پر جاری ہے۔

مہم کے دوران بلوچستان ریونیو اتھارٹی کی ٹیموں نے کوئٹہ کے مختلف ریسٹورنٹس اور فوڈ آؤٹ لیٹس، جن میں کابل جی ریسٹورنٹ، ایمپائر فوڈ کارنر، نیو ڈومینوز پیزا، سویٹ بائٹس، کیفے زمزمہ، بی بیری اور دیگر شامل ہیں، کا دورہ کیا۔

اس موقع پر کاروباری مالکان کو آگاہ کیا گیا کہ فنانس ایکٹ 2026 کے تحت ریسٹورنٹس اور فوڈ سروسز پر سیلز ٹیکس کی شرح 2 فیصد سے بڑھا کر 4 فیصد کر دی گئی ہے۔ انہیں ہدایت کی گئی کہ نئی شرح کا فوری نفاذ یقینی بنائیں، بروقت ٹیکس گوشوارے جمع کرائیں، واجب الادا ٹیکس ادا کریں اور جہاں ضروری ہو بلوچستان ریونیو اتھارٹی میں رجسٹریشن کروائیں۔

بلوچستان ریونیو اتھارٹی نے واضح کیا کہ ٹیکس قوانین پر مکمل عمل درآمد تمام سروس فراہم کرنے والوں کی قانونی ذمہ داری ہے۔ اتھارٹی نے خبردار کیا کہ بلوچستان سیلز ٹیکس آن سروسز ایکٹ 2015 کی خلاف ورزی کرنے والے کاروباروں کے خلاف قانونی کارروائی کی جائے گی۔

اتھارٹی نے اس عزم کا اعادہ کیا کہ شفاف ٹیکس نظام، کاروبار دوست ماحول اور صوبائی آمدنی میں اضافے کے لیے بلوچستان بھر میں آگاہی اور نگرانی کی مہم جاری رکھی جائے گی۔