وزیر اعلیٰ بلوچستان میر سرفراز بگٹی سے اقوام متحدہ کے اعلیٰ سطحی وفد کی ملاقات

رپورٹ: سیدہ نتاشا

وزیر اعلیٰ بلوچستان میر سرفراز بگٹی سے اقوام متحدہ کے ریزیڈنٹ کوآرڈینیٹر محمد یحییٰ کی قیادت میں اقوام متحدہ کے ایک اعلیٰ سطحی وفد نے ملاقات کی۔ ملاقات میں باہمی دلچسپی کے امور، صوبے میں انسانی ترقی، مفادِ عامہ، انسانی حقوق، افغان مہاجرین کے معاملات، موسمیاتی تبدیلیوں اور ترقیاتی تعاون پر تفصیلی تبادلۂ خیال کیا گیا۔
اقوام متحدہ کے وفد نے بلوچستان میں کم عمری کی شادی کی ممانعت سے متعلق قانون سازی، یوتھ اسکلز ڈویلپمنٹ پروگرام، ویمن انڈومنٹ فنڈ کے قیام اور انسانی حقوق و مفادِ عامہ سے متعلق اصلاحاتی اقدامات کو سراہتے ہوئے حکومتِ بلوچستان کو ان کامیاب اقدامات پر مبارکباد دی۔

اس موقع پر گفتگو کرتے ہوئے وزیر اعلیٰ بلوچستان میر سرفراز بگٹی نے کہا کہ بلوچستان کو موسمیاتی تبدیلیوں اور دہشت گردی جیسے سنگین چیلنجز کا سامنا ہے، تاہم حکومت نے جامع اور مؤثر حکمتِ عملی کے ذریعے دہشت گردی کے واقعات میں نمایاں کمی لائی ہے۔ انہوں نے کہا کہ موسمیاتی اثرات سے نمٹنے کے لیے صوبے میں پہلی مرتبہ کلائمیٹ فنڈ قائم کیا گیا ہے جو ایک تاریخی اقدام ہے۔
وزیر اعلیٰ نے کہا کہ غیر ملکی تارکین وطن کے انخلاء کے حوالے سے حکومتِ بلوچستان وفاقی پالیسیوں پر مکمل عمل درآمد کر رہی ہے، جبکہ خواتین، بچوں اور ضعیف افراد کے ساتھ خصوصی رعایت اور احترام کو یقینی بنایا جا رہا ہے۔ انہوں نے واضح کیا کہ انخلاء کے عمل کے دوران خواتین کو ہراسگی کا کوئی واقعہ پیش نہیں آیا۔

انہوں نے اقوام متحدہ بالخصوص یو این ایچ سی آر کے تعاون کو سراہتے ہوئے کہا کہ تعلیم، صحت، سولرائزیشن اور دیگر عوامی شعبوں میں اقوام متحدہ کی شراکت داری قابلِ تحسین ہے۔ یو این ایچ سی آر کی جانب سے ایک ارب روپے مالیت کی 48 شمسی توانائی سے چلنے والی عوامی سہولیات صوبائی حکومت کے حوالے کرنا صاف توانائی اور پائیدار ترقی کی جانب اہم سنگِ میل ہے۔
یو این ایچ سی آر کی کنٹری نمائندہ فلپا کینڈلر نے کہا کہ افغان مہاجرین اور میزبان کمیونٹیز کو خدمات فراہم کرنے والے اداروں کے لیے قابلِ اعتماد توانائی ناگزیر ہے، جبکہ اقوام متحدہ مہاجرین کے وقار، تحفظ اور ضروریات کو اولین ترجیح دیتی رہے گی۔
اقوام متحدہ کے ریزیڈنٹ کوآرڈینیٹر محمد یحییٰ نے بلوچستان میں اصلاحاتی اقدامات، انسانی حقوق کے تحفظ اور افغان مہاجرین کی میزبانی کے حوالے سے حکومتِ بلوچستان کے کردار کو سراہتے ہوئے تعاون کو مزید وسعت دینے کے عزم کا اظہار کیا۔
ملاقات میں یو این ایچ سی آر، آئی او ایم اور دیگر متعلقہ اداروں کے اعلیٰ حکام بھی شریک تھے۔

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands