وزیراعلیٰ بلوچستان کا کوہلو کا دورہ، ترقیاتی منصوبوں اور انتظامی اصلاحات کا اعلان

رپورٹ: سیدہ نتاشا

 وزیراعلیٰ بلوچستان میر سرفراز بگٹی ایک روزہ دورے پر کوہلو پہنچے جہاں سابق صوبائی وزیر میر نصیب اللہ مری اور قبائلی عمائدین نے ان کا استقبال کیا۔ وزیراعلیٰ کے ہمراہ رکن صوبائی اسمبلی اور پاکستان پیپلز پارٹی کے رہنما علی مدد جتک بھی موجود تھے۔ کوہلو پہنچنے پر پیپلز پارٹی کے کارکنان نے سڑکوں پر کھڑے ہو کر وزیراعلیٰ کی آمد پر انہیں خوش آمدید کہا۔

اس موقع پر وزیراعلیٰ نے قبائلی عمائدین، پارٹی کارکنان اور عہدیداران سے خطاب کرتے ہوئے شہید میر گل خان مری اور جسٹس محمد نواز مری کو خراجِ عقیدت پیش کیا۔ انہوں نے کہا کہ امن و امان کی بحالی کے لیے کوہلو کے عوام اور سیکیورٹی فورسز نے بے پناہ قربانیاں دی ہیں، جس کے نتیجے میں علاقے میں امن کی صورتحال میں نمایاں بہتری آئی ہے۔
وزیراعلیٰ نے کہا کہ کوہلو ان کا دوسرا گھر ہے اور یہاں کے عوام سے ان کا دیرینہ تعلق ہے۔ انہوں نے کوہلو کے عوام کی فلاح و بہبود کے لیے ڈسٹرکٹ کونسل کے رواں سال کے بجٹ میں 50 کروڑ روپے اضافی گرانٹ دینے کا اعلان کیا۔ ان کا کہنا تھا کہ کوہلو شہر میں ٹف ٹائلز اور سیوریج نظام کی بہتری کے لیے بھی فنڈز مختص کیے گئے ہیں۔
وزیراعلیٰ نے سب تحصیل رحمان آباد، سب تحصیل گرسنی اور سب تحصیل تمبو کو تحصیل کا درجہ دینے جبکہ یونین کونسل کرم خان شہر کو سب تحصیل کا درجہ دینے کا بھی اعلان کیا۔ اپنے خطاب میں انہوں نے کہا کہ قبائلی دشمنیوں کا حل باہمی افہام و تفہیم سے ممکن ہے اور ایسے مسائل انٹرنیٹ یا سوشل میڈیا پر حل نہیں ہوتے۔
انہوں نے کہا کہ ان پر ایک سرکاری ذمہ داری کے ساتھ ساتھ ایک قبائلی ذمہ داری بھی عائد ہوتی ہے جسے وہ پوری دیانتداری سے نبھانا چاہتے ہیں۔ وزیراعلیٰ نے کہا کہ ان کی کوشش ہے کہ قبائلی تنازعات کا مکمل خاتمہ کر کے علاقے کو مجموعی ترقی اور خوشحالی کی راہ پر گامزن کیا جائے۔ انہوں نے مری قبائل کو باشعور قرار دیتے ہوئے کہا کہ برادر بلوچ اقوام کے مابین تنازعات کو بھی افہام و تفہیم سے حل کیا جائے گا۔

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands