وزیراعلیٰ بلوچستان کا کیپٹن کرنل شیر خان شہید کی 27ویں برسی پر شاندار خراجِ عقیدت
وزیراعلیٰ بلوچستان میر سرفراز بگٹی نے کیپٹن کرنل شیر خان شہید کو پاکستان کی عسکری تاریخ میں بہادری، ایثار اور حب الوطنی کی روشن علامت قرار دیا۔ انہوں نے کہا کہ شہداء کی قربانیوں کی بدولت پاکستان محفوظ اور خودمختار ہے، اور حکومت بلوچستان دفاعِ وطن کے لیے مسلح افواج کے شانہ بشانہ کھڑی رہے گی۔
وزیراعلیٰ بلوچستان میر سرفراز بگٹی نے نشانِ حیدر کے حامل کیپٹن کرنل شیر خان شہید کی 27ویں برسی کے موقع پر انہیں زبردست خراجِ عقیدت پیش کرتے ہوئے کہا ہے کہ وہ پاکستان کی عسکری تاریخ میں بے مثال بہادری، جرات اور قربانی کی روشن علامت ہیں۔
سماجی رابطے کی ویب سائٹ پر اپنے پیغام میں وزیراعلیٰ نے کہا کہ کارگل تنازع کے دوران انتہائی نامساعد حالات کے باوجود کیپٹن کرنل شیر خان شہید نے غیر معمولی بہادری، عزم اور پیشہ ورانہ مہارت کا مظاہرہ کیا۔ انہوں نے کہا کہ شیر خان شہید کی قربانی وفاداری، فرض شناسی اور ایثار کی اعلیٰ ترین مثال ہے، جو ہمیشہ قوم اور مسلح افواج کے لیے مشعلِ راہ بنی رہے گی۔
میر سرفراز بگٹی نے کہا کہ وطنِ عزیز کا دفاع ہر پاکستانی کا مقدس فریضہ ہے اور شہداء کی لازوال قربانیوں کی بدولت آج پاکستان دنیا کے نقشے پر عزت، امن اور خودمختاری کے ساتھ قائم ہے۔ انہوں نے کہا کہ قوم اپنے شہداء کو ہمیشہ انتہائی احترام کی نگاہ سے دیکھتی رہے گی اور ان کی قربانیاں آنے والی نسلوں کے لیے حب الوطنی، جرات اور استقامت کی دائمی علامت رہیں گی۔
وزیراعلیٰ بلوچستان نے مزید کہا کہ کیپٹن کرنل شیر خان شہید کی شہادت اس حقیقت کی یاد دلاتی ہے کہ آزادی اور خودمختاری مفت حاصل نہیں ہوتی بلکہ وطن کے بہادر سپوتوں کے خون سے محفوظ بنتی ہے۔
انہوں نے اس عزم کا اعادہ کیا کہ حکومت بلوچستان اور صوبے کے عوام ملک کو درپیش اندرونی و بیرونی خطرات کے خلاف پاکستان کی مسلح افواج کے شانہ بشانہ کھڑے رہیں گے اور وطن کے دفاع، سلامتی اور استحکام کے لیے ہر ممکن قربانی دینے سے دریغ نہیں کریں گے۔
Related News
