کوئٹہ میں کسٹمز ڈے کی مناسبت سے کلیکٹریٹ میں تقریب کا انعقاد

رپورٹ: سیدہ نتاشا

کوئٹہ میں عالمی کسٹمز ڈے کی مناسبت سے کلیکٹریٹ کسٹمز میں ایک پروقار تقریب کا انعقاد کیا گیا۔ تقریب میں چیف کلکٹر کسٹمز بلوچستان مقصود احمد، کلکٹر انفورسمنٹ کوئٹہ کرم اللہ سمیت کسٹمز کے اعلیٰ افسران اور عملے نے شرکت کی۔
تقریب سے خطاب کرتے ہوئے چیف کلکٹر کسٹمز مقصود احمد نے کہا کہ آج پوری دنیا میں کسٹمز ڈے منایا جا رہا ہے، جس کا بنیادی مقصد اسمگلنگ کے تدارک اور قانونی تجارت کے فروغ کو یقینی بنانا ہے۔ انہوں نے بتایا کہ کسٹمز بلوچستان ملک بھر اور بالخصوص اس ریجن میں دیگر قانون نافذ کرنے والے اداروں کے ساتھ مل کر اسمگلنگ کی روک تھام کے لیے مؤثر اقدامات کر رہا ہے۔

چیف کلکٹر نے انکشاف کیا کہ مالی سال کے پہلے چھ ماہ کے دوران کسٹمز بلوچستان نے مقررہ ہدف سے زائد ریونیو حاصل کیا ہے۔ انہوں نے کہا کہ اگرچہ بلوچستان میں افغانستان بارڈر بند ہونے کے باعث تجارت متاثر ہوئی ہے، اس کے باوجود کسٹمز کی کوشش ہے کہ ریونیو اہداف مکمل کیے جائیں۔ انہوں نے مزید کہا کہ وفاقی حکومت کی پالیسیوں کے تسلسل میں رہتے ہوئے معاشی صورتحال کی بہتری کے لیے بھرپور کردار ادا کیا جا رہا ہے۔
اس موقع پر کلکٹر انفورسمنٹ کوئٹہ کرم اللہ نے کہا کہ محدود وسائل اور نفری کے باوجود کسٹمز بلوچستان اپنے فرائض احسن طریقے سے انجام دے رہی ہے۔ انہوں نے واضح کیا کہ کسٹمز نے کسی بھی دکان پر بلاوجہ چھاپے نہیں مارے اور نہ ہی عام تاجروں کو نقصان پہنچایا گیا ہے۔
کرم اللہ کے مطابق کارروائیاں صرف مصدقہ اطلاعات کی بنیاد پر ان گوداموں کے خلاف کی گئیں جہاں ممنوعہ اسمگل شدہ سامان موجود تھا۔ انہوں نے کہا کہ کوشش ہوتی ہے کہ اسمگل شدہ سامان کو مارکیٹ تک پہنچنے سے پہلے ہی روک لیا جائے، تاہم اگر ایسا سامان مارکیٹ میں آ بھی جائے تو اس کے خلاف بھی کارروائی کی جاتی ہے۔
انہوں نے مزید کہا کہ پنجاب اور سندھ سے آنے والے سامان کا بھی جائزہ لیا جاتا ہے اور اگر وہ ممنوعہ ہو تو اسے ہرگز نہیں چھوڑا جاتا۔
تقریب کے اختتام پر چیف کلکٹر کسٹمز نے نمایاں کارکردگی دکھانے والے افسران میں تعریفی اسناد تقسیم کیں۔

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands