ڈاکٹروں کا احتجاج ختم، کوئٹہ کے سرکاری ہسپتالوں میں او پی ڈیز اور طبی خدمات بحال
سول ہسپتال کوئٹہ سمیت دیگر سرکاری ہسپتالوں میں ڈاکٹروں نے احتجاج ختم کرتے ہوئے او پی ڈیز، آپریشن تھیٹرز اور دیگر طبی خدمات دوبارہ بحال کر دی ہیں۔ پاکستان میڈیکل ایسوسی ایشن نے عوامی مشکلات کے پیش نظر احتجاج مؤخر کرتے ہوئے مطالبات پر پیش رفت نہ ہونے کی صورت میں آئندہ لائحہ عمل اختیار کرنے کا عندیہ دیا۔
کوئٹہ: سول ہسپتال کوئٹہ سمیت صوبے کے دیگر سرکاری ہسپتالوں میں ڈاکٹروں نے احتجاج اور او پی ڈیز و آپریشن تھیٹرز کے بائیکاٹ کا خاتمہ کرتے ہوئے اپنی خدمات دوبارہ شروع کر دی ہیں، جس کے بعد تمام شعبے معمول کے مطابق بحال ہو گئے ہیں۔
پاکستان میڈیکل ایسوسی ایشن (پی ایم اے) کوئٹہ زون کے ترجمان کے مطابق یہ فیصلہ کمشنر کوئٹہ ڈویژن اور ڈپٹی کمشنر کوئٹہ سے ملاقات کے بعد کیا گیا، جنہوں نے مریضوں کو درپیش مشکلات کے پیش نظر ڈاکٹروں سے احتجاج ختم کرنے کی اپیل کی تھی۔
ترجمان نے بتایا کہ ڈاکٹروں کا احتجاج سرکاری ہسپتالوں میں طبی عملے کو مؤثر سکیورٹی فراہم کرنے اور دیگر جائز مطالبات کے حق میں کیا جا رہا تھا۔ عوامی مشکلات کو مدنظر رکھتے ہوئے فی الحال احتجاج ختم کر کے او پی ڈی سمیت تمام طبی خدمات بحال کر دی گئی ہیں۔
انہوں نے مزید کہا کہ اگر مطالبات پر پیش رفت نہ ہوئی تو آئندہ احتجاجی لائحہ عمل پر دوبارہ غور کیا جا سکتا ہے۔
Keywords : Civil Hospital Quetta, Doctors Protest, OPDs Services, Pakistan Medical Association
Related News
