کوئٹہ میں ہائر ایجوکیشن کمیشن کے ریجنل سینٹر کا سنگ بنیاد رکھ دیا گیا
کوئٹہ: گورنر بلوچستان جعفر خان مندوخیل نے اعلیٰ تعلیم کے فروغ کے لیے ہائر ایجوکیشن کمیشن کے ریجنل سینٹر کا سنگ بنیاد رکھ دیا۔ 78.61 ملین روپے کی لاگت سے تعمیر ہونے والا یہ مرکز صوبے میں تحقیق، جدت اور اعلیٰ تعلیمی اداروں کی استعداد بڑھانے میں اہم کردار ادا کرے گا۔
رپورٹ: نتاشا
بلوچستان میں اعلیٰ تعلیم کے فروغ کے لیے گورنر بلوچستان جعفر خان مندوخیل نے کوئٹہ میں ہائر ایجوکیشن کمیشن کے ریجنل سینٹر کا سنگ بنیاد رکھ دیا۔ تقریب میں چیئرمین ایچ ای سی ڈاکٹر نیاز احمد اختر، مختلف جامعات کے وائس چانسلرز، ماہرین تعلیم اور اعلیٰ حکام نے شرکت کی۔گورنر بلوچستان نے اس موقع پر کہا کہ ایچ ای سی ریجنل سینٹر کا قیام صوبے میں معیاری اعلیٰ تعلیم کے فروغ کی جانب ایک تاریخی سنگ میل ہے۔ ان کا کہنا تھا کہ یہ منصوبہ صرف ایک ریجنل سینٹر نہیں بلکہ تعلیم یافتہ بلوچستان کے دیرینہ خواب کی تعبیر ہے۔ ہائر ایجوکیشن کمیشن ملک بھر کی جامعات کو ترقی کی راہ پر گامزن کرنے اور اعلیٰ تعلیم کے معیار کو بہتر بنانے میں اہم کردار ادا کر رہا ہے۔
اٹھہتر اعشاریہ اکسٹھ ملین روپے کی لاگت سے تعمیر ہونے والا یہ ریجنل سینٹر رواں سال کے آخر تک مکمل کیا جائے گا۔ گورنر بلوچستان نے منصوبے کو سولر انرجی سسٹم پر منتقل کرنے، گیسٹ ہاؤس کے قیام اور تعمیراتی معیار کو یقینی بنانے کی ہدایت دیتے ہوئے کہا کہ منصوبے کو مقررہ وقت میں مکمل کرنا انتہائی ضروری ہے۔
انہوں نے کہا کہ اس مرکز کے قیام سے بلوچستان بھر کی جامعات اور اعلیٰ تعلیمی اداروں کو مزید مضبوطی ملے گی جبکہ تحقیق، جدت اور تعلیمی ترقی کے نئے مواقع پیدا ہوں گے۔ گورنر بلوچستان نے وزیراعظم پاکستان میاں محمد شہباز شریف اور چیئرمین ہائر ایجوکیشن کمیشن ڈاکٹر نیاز احمد اختر کا شکریہ ادا کرتے ہوئے کہا کہ وفاق اور صوبہ مل کر کوالٹی ایجوکیشن کی مضبوط بنیاد رکھ رہے ہیں تاکہ آنے والی نسلوں کو بہتر تعلیمی مواقع اور پائیدار ترقی کے ثمرات فراہم کیے جاسکیں۔
Keywords : HEC Regional Centre, Higher Education, Quetta, Education Development
Related News
