گورنر بلوچستان کا سماجی اصلاحات میں سوشل نیٹ ورکس کے کردار پر زور

کوئٹہ: گورنر بلوچستان جعفر خان مندوخیل نے کہا ہے کہ سماجی اصلاحات اور سماجی روابط کے درمیان گہرا تعلق موجود ہے، اور انسانی تاریخ اس بات کی گواہ ہے کہ اصلاحات نے تعلیم، صحت، بنیادی حقوق، خواتین کی بااختیاری اور سماجی انصاف کے فروغ میں اہم کردار ادا کیا ہے۔

گورنر ہاؤس کوئٹہ میں بلوچستان ریفارمز سوشل نیٹ ورک کے وفد سے گفتگو کرتے ہوئے انہوں نے کہا کہ سماجی اصلاحات اکثر ایسے نیٹ ورکس کے ذریعے مضبوط اور مؤثر بنتی ہیں جن میں دانشور، کمیونٹی رہنما، سول سوسائٹی، میڈیا اور عام شہری شامل ہوتے ہیں۔ ان کے مطابق یہ نیٹ ورکس خیالات کے تبادلے، عوامی شعور بیدار کرنے اور اجتماعی کوششوں کو تیز کرنے میں مدد دیتے ہیں۔

انہوں نے کہا کہ مؤثر سماجی اصلاحی نیٹ ورکس علمی مکالمے اور شہری شرکت کو فروغ دیتے ہیں، جبکہ کامیاب اصلاحات کے لیے مضبوط ادارے، عوامی اعتماد اور اجتماعی مفاد کا احساس ضروری ہے۔ گورنر نے بلوچستان ریفارمز سوشل نیٹ ورک کی سماجی اور فلاحی سرگرمیوں کو سراہا۔

جعفر خان مندوخیل نے کہا کہ خواتین کسی بھی معاشرے کا بنیادی ستون ہیں اور انہیں نظرانداز کر کے ترقی کا خواب پورا نہیں کیا جا سکتا۔

وفد نے گورنر کو تنظیم کی سماجی، تعلیمی اور فلاحی سرگرمیوں سے آگاہ کیا اور انہیں ایک نمائش کی افتتاحی تقریب میں شرکت کی دعوت بھی دی۔