بلوچستان میں شدید گرمی برقرار، متعدد اضلاع میں بارش اور تیز ہواؤں کی پیشگوئی
محکمہ موسمیات نے آئندہ 48 سے 72 گھنٹوں کے دوران بلوچستان کے بیشتر اضلاع میں گرم اور خشک موسم جبکہ بعض علاقوں میں بارش، گرج چمک اور آندھی کی پیشگوئی کی ہے۔ شہریوں کو موسم کی اچانک تبدیلیوں سے محتاط رہنے اور کاشتکاروں کو تیز ہواؤں اور گرد آلود طوفانوں سے فصلوں کے تحفظ کے لیے احتیاطی تدابیر اختیار کرنے کی ہدایت کی گئی ہے۔
کوئٹہ: ریجنل میٹرولوجیکل سینٹر کوئٹہ نے آئندہ 48 سے 72 گھنٹوں کے دوران بلوچستان کے بیشتر اضلاع میں موسم گرم اور خشک رہنے کی پیشگوئی کی ہے، جبکہ نوکنڈی، واشک، پنجگور، کیچ، دالبندین، خاران، نوشکی، سبی، نصیرآباد، صحبت پور، جھل مگسی اور اُستا محمد میں شدید گرمی کی توقع ظاہر کی گئی ہے۔
محکمہ موسمیات کے مطابق گزشتہ 24 گھنٹوں کے دوران تربت میں زیادہ سے زیادہ درجہ حرارت 45.5 ڈگری سینٹی گریڈ ریکارڈ کیا گیا، جبکہ قلات میں کم سے کم درجہ حرارت 32 ڈگری سینٹی گریڈ رہا۔
پیشگوئی کے مطابق ژوب، شیرانی، بارکھان، موسیٰ خیل، لورالائی، دکی، کوہلو، ڈیرہ بگٹی، خضدار، کوئٹہ، زیارت اور ہرنائی میں چند مقامات پر بارش، آندھی اور گرج چمک کا امکان ہے، جبکہ ژوب، بارکھان، موسیٰ خیل، زیارت، ہرنائی، لورالائی اور خضدار میں مطلع جزوی ابر آلود رہنے اور ہلکی بارش کی بھی توقع ہے۔
اسی طرح چاغی، واشک، خاران، نوشکی، آواران، پنجگور، کیچ اور ساحلی علاقوں میں دوپہر اور شام کے اوقات میں تیز اور گرد آلود ہوائیں چلنے کا امکان ظاہر کیا گیا ہے۔
محکمہ موسمیات نے شہریوں، خصوصاً شمالی اور ساحلی اضلاع کے رہائشیوں کو موسم کی اچانک تبدیلیوں کے پیش نظر احتیاط برتنے کی ہدایت کی ہے، جبکہ کاشتکاروں کو تیز ہواؤں اور گرد کے باعث کھڑی فصلوں کے تحفظ کے لیے پیشگی اقدامات کرنے کا مشورہ دیا گیا ہے۔
Keywords : Balochistan Weather, Heatwave, Rain Forecast, Dust Storms
Related News
.jpeg)
