آئی جی بلوچستان کا پولیس ٹریننگ کالج کا دورہ، پولیس فورس میں کھیلوں کے فروغ پر زور

رپورٹ: سیدہ نتاشا

انسپکٹر جنرل پولیس بلوچستان محمد طاہر نے پولیس ٹریننگ کالج کا دورہ کیا، جہاں انہوں نے کمانڈنٹ پی ٹی سی اور زیر تربیت اہلکاروں کے مابین کھیلے جانے والے کرکٹ میچ کے موقع پر کھلاڑیوں سے خطاب کیا۔
آئی جی پولیس نے کہا کہ بلوچستان پولیس میں کھیلوں کے فروغ اور نوجوان کھلاڑیوں کو تمام سہولیات فراہم کرنا اولین ترجیح ہے، کیونکہ کھیلوں کے میدان آباد ہونے سے معاشرہ منفی سرگرمیوں سے پاک رہتا ہے اور نوجوان نسل ذہنی و جسمانی طور پر مضبوط ہوتی ہے۔

انہوں نے زیر تربیت جوانوں کی کارکردگی کو سراہتے ہوئے کہا کہ بلوچستان پولیس کے نوجوان کھلاڑی قومی سطح پر صوبے اور ادارے کا نام روشن کر رہے ہیں جو باعثِ فخر ہے۔ آئی جی پولیس کے مطابق کھیلوں کی سرگرمیاں فورس میں نظم و ضبط، برداشت، ٹیم ورک اور پیشہ ورانہ مہارتوں کو فروغ دیتی ہیں۔
دورے کے دوران آئی جی پولیس بلوچستان نے کرکٹ، فٹ بال اور والی بال کھیلنے والے لیویز کے زیر تربیت جوانوں سے مصافحہ کیا اور ان کے جذبے اور محنت کی تعریف کی۔ اس موقع پر زیر تربیت جوانوں کے لیے فٹسال نائٹ ٹورنامنٹ، فٹ بال اور والی بال کے باقاعدہ مقابلے بھی منعقد کیے گئے، جن کا مقصد جسمانی فٹنس اور مثبت سرگرمیوں کا فروغ تھا۔
کرکٹ، فٹ بال اور والی بال کے فائنل مقابلے پی ٹی سی کمانڈنٹ اسٹاف ٹیم اور زیر تربیت جوانوں کے درمیان کھیلے گئے، جہاں سخت مقابلوں کے بعد تینوں فارمیٹس میں کمانڈنٹ اسٹاف ٹیم نے کامیابی حاصل کی۔
تقریب میں آئی جی پولیس بلوچستان بطور مہمانِ خصوصی خود بھی کرکٹ میچ میں شریک ہوئے، جس سے زیر تربیت جوانوں کے حوصلے اور جوش میں مزید اضافہ ہوا۔ اس موقع پر ایڈیشنل آئی جی و کمانڈنٹ بی سی اشفاق احمد، کمانڈنٹ پی ٹی سی شہراد اکبر، پی ایس او اعتزاز احمد سمیت دیگر سینئر افسران بھی موجود تھے۔
تقریب کے اختتام پر آئی جی پولیس بلوچستان نے کھیلوں میں نمایاں کارکردگی دکھانے والے زیر تربیت جوانوں میں انعامات تقسیم کیے اور اس عزم کا اظہار کیا کہ بلوچستان پولیس میں صحت مند اور مثبت سرگرمیوں کے فروغ کا یہ سلسلہ آئندہ بھی جاری رکھا جائے گا۔

Funeral Prayers Offered for Ziarat Attack Martyrs, Policemen Laid to Rest with State Honours

Balochistan Delegation Visits Sukkur Barrage to Secure Province's Water Share

Two Health Facilities in Ziarat to Be Renamed After Martyred Police Personnel

Koila Phatak Chowk Renamed as Shuhada-e-Ziarat Chowk in Tribute to Ziarat Police Martyrs

PDMA Issues Flash Flood Alert for Balochistan Until July 23

Balochistan Government, Dharna Committee Reach Agreement on Ziarat Martyrs' Demands