جھل مگسی ڈیزرٹ چیلنج جیپ ریلی 2025 شاندار انداز میں اختتام پذیر

رپورٹ: سیدہ نتاشا
اکیسویں جھل مگسی ڈیزرٹ چیلنج جیپ ریلی 2025 اتوار کی شام شاندار انداز میں اختتام پذیر ہو گئی۔ اس تاریخی ایونٹ کے مہمانِ خصوصی گورنر بلوچستان جعفر خان مندوخیل تھے۔ ریلی میں نوابزادہ جعفر خان مگسی نے سب سے کم وقت میں ٹریک مکمل کرتے ہوئے پہلی پوزیشن حاصل کی اور فتح اپنے نام کی۔
تقریب میں جھل مگسی اور گرد و نواح کے علاقوں کے سیاسی و قبائلی عمائدین کے ساتھ ساتھ ملک بھر سے آئے ہزاروں شائقین نے شرکت کی، جنہوں نے صحرائی میدانوں میں ریسرز کی مہارت اور جرات کو خوب سراہا۔ اس موقع پر گورنر بلوچستان نے تمام ریسرز کے لیے ایک کروڑ روپے نقد انعام کا اعلان کیا جبکہ مختلف کیٹیگریز میں کامیاب ہونے والے شرکا میں انعامات تقسیم کیے گئے۔
جھل مگسی ڈیزرٹ چیلنج جیپ ریلی 2025 کو ایک یادگار اور کامیاب ایونٹ قرار دیا گیا۔ تقریب میں وفاقی وزیر نوابزادہ خالد مگسی، وفاقی وزیر تجارت میر جام کمال، رکن قومی اسمبلی نوابزادہ عامر خان مگسی اور دیگر معزز شخصیات کی موجودگی نے ریلی کے وقار اور جوش میں مزید اضافہ کیا۔