قلات کا مشہور آلو بخارا سیزن عروج پر، ملک بھر کی منڈیوں کی زینت بن گیا

پہاڑوں کی ٹھنڈی ہوا، سرسبز باغات اور درختوں سے لٹکتے سرخ پھل، یہ منظر ہے قلات کا جہاں آلو بخارے کی فصل اپنے عروج پر ہے۔

یہ کوئی عام آلو بخارا نہیں بلکہ قلات کا مشہور آلو بخارا ہے، جس کا انتظار ملک بھر کی منڈیوں میں پورا سال کیا جاتا ہے۔ رس سے بھرپور اور کھٹے میٹھے ذائقے والا یہ پھل نہ صرف بلوچستان بلکہ کراچی، لاہور، اسلام آباد اور دیگر بڑے شہروں کی منڈیوں کی رونق سمجھا جاتا ہے۔

اس سال موافق موسمی حالات کے باعث آلو بخارے کی فصل نہ صرف بھرپور بلکہ بہترین معیار کی تیار ہوئی ہے۔ باغات میں چنائی کا عمل جاری ہے، جبکہ تازہ پھل روزانہ سینکڑوں کریٹس میں پیک کرکے مختلف شہروں کو بھیجا جا رہا ہے۔

یہ سیزن مقامی معیشت کے لیے بھی اہمیت رکھتا ہے، کیونکہ باغات، پیکنگ اور ٹرانسپورٹ کے شعبوں میں سیکڑوں افراد کو روزگار کے مواقع میسر آ رہے ہیں۔

قلات کے باغات اس وقت خوشبوؤں اور سرگرمیوں سے بھرے ہوئے ہیں، اور بلوچستان کا یہ میٹھا تحفہ ایک بار پھر ملک بھر کے صارفین کی توجہ حاصل کر رہا ہے۔

Keywords : Kalat Plum, Balochistan Agriculture, Fruit Harvest, Local Economy