بلوچستان بھر میں محرم الحرام کے جلوس اور مجالس پرامن اختتام پذیر، وزیراعلیٰ کا اداروں اور عوام کو خراجِ تحسین

کوئٹہ: وزیراعلیٰ بلوچستان میر سرفراز بگٹی نے کہا ہے کہ صوبے بھر میں محرم الحرام کے تمام جلوس اور مجالس پرامن اور خیر و عافیت سے اختتام پذیر ہو گئے ہیں۔

اپنے ایک بیان میں وزیراعلیٰ بلوچستان نے ضلعی انتظامیہ، پولیس، قانون نافذ کرنے والے اداروں، رضاکاروں، علمائے کرام، منتظمینِ مجالس و جلوس اور عوام کا تہہ دل سے شکریہ ادا کرتے ہوئے کہا کہ ان کے تعاون، ذمہ داری کے مظاہرے اور بروقت رابطہ کاری کی بدولت گزشتہ برسوں کے مقابلے میں بہتر انتظامات کو یقینی بنایا گیا۔

میر سرفراز بگٹی نے کہا کہ محرم الحرام کے دوران تمام متعلقہ اداروں نے مکمل ہم آہنگی کے ساتھ فرائض انجام دیے، جس کے نتیجے میں صوبے بھر میں امن و امان کی فضا برقرار رہی۔ انہوں نے اس امید کا اظہار کیا کہ عوامی تعاون اور اداروں کی مشترکہ کاوشوں سے بلوچستان میں امن، اتحاد اور بھائی چارے کی فضا مزید مستحکم ہوگی۔

وزیراعلیٰ بلوچستان نے دعا کی کہ اللہ تعالیٰ صوبے اور ملک کو ہمیشہ امن، اتحاد اور استحکام کی نعمت سے مالامال رکھے۔