یومِ عاشورہ: بلوچستان بھر میں سخت سیکیورٹی انتظامات، 32 ہزار سے زائد اہلکار تعینات

کوئٹہ: یومِ عاشورہ کے جلوسوں کے پرامن انعقاد اور امن و امان کی صورتحال کو یقینی بنانے کے لیے بلوچستان بھر میں سخت سیکیورٹی انتظامات نافذ کر دیے گئے ہیں۔ صوبے بھر میں 32 ہزار سے زائد سیکیورٹی اہلکار تعینات کیے گئے ہیں جبکہ صوبائی دارالحکومت کوئٹہ میں 17 ہزار سے زائد اہلکار مختلف مقامات پر فرائض انجام دے رہے ہیں۔

سرکاری ذرائع کے مطابق سیکیورٹی پلان کے تحت جلوسوں کی نگرانی سی سی ٹی وی کیمروں اور فضائی نگرانی کے ذریعے کی جائے گی۔ بم ڈسپوزل اسکواڈ کی خصوصی ٹیمیں جلوسوں کے راستوں اور اطراف کے علاقوں میں سرچ اور سوئپنگ آپریشنز انجام دے رہی ہیں تاکہ کسی بھی ممکنہ خطرے کا بروقت تدارک کیا جا سکے۔ جلوسوں کے راستوں پر اچانک چیکنگ کا سلسلہ بھی جاری رہے گا۔

کوئٹہ میں مرکزی جلوسِ عاشورہ کے لیے خصوصی حفاظتی اقدامات کیے گئے ہیں۔ جلوس کے راستوں، حساس مقامات، امام بارگاہوں اور شہر کے داخلی و خارجی راستوں پر پولیس، بلوچستان کانسٹیبلری، ریسپانس فورس، انسداد دہشت گردی فورس، فرنٹیئر کور اور اینٹی رائٹس فورس کے اہلکار تعینات کیے گئے ہیں۔

ڈپٹی انسپکٹر جنرل پولیس کوئٹہ لیفٹیننٹ (ر) عمران شوکت نے بتایا کہ مرکزی جلوسِ عاشورہ کے لیے فول پروف سیکیورٹی انتظامات کو حتمی شکل دے دی گئی ہے۔ ان کے مطابق جلوس کے تمام راستوں کو مکمل طور پر سیل کر دیا گیا ہے اور داخلی و خارجی راستوں پر مؤثر نگرانی کا نظام قائم کیا گیا ہے، جبکہ فضائی نگرانی بھی سیکیورٹی پلان کا حصہ ہوگی۔

سیکیورٹی انتظامات کے تحت جلوسوں کے راستوں پر واقع دکانیں، بازار، پلازے اور کاروباری مراکز تاجروں اور دکانداروں کے نمائندوں کی موجودگی میں بند کر دیے گئے ہیں۔ حکام کے مطابق یہ اقدامات عزاداروں کی حفاظت اور کسی بھی ناخوشگوار واقعے سے بچاؤ کے لیے کیے گئے ہیں۔

حکام نے اعلان کیا ہے کہ جامع سیکیورٹی پلان کے تحت 9 اور 10 محرم الحرام کو کوئٹہ سمیت بلوچستان کے مختلف اضلاع میں صبح 6 بجے سے رات 8 بجے تک موبائل فون اور انٹرنیٹ سروس معطل رہے گی تاکہ امن و امان کی صورتحال برقرار رکھی جا سکے۔

Keywords : Ashura Security, Balochistan Police, Aerial Surveillance, Muharram 2026