پی ڈی ایم اے بلوچستان کا ہیٹ ویو سے متعلق آگاہی سیشن، حفاظتی اقدامات پر زور

 پروونشل ڈیزاسٹر مینجمنٹ اتھارٹی (پی ڈی ایم اے) بلوچستان کی جانب سے شدید گرمی کی لہر (ہیٹ ویو) سے نمٹنے اور حفاظتی اقدامات کے حوالے سے ایک آگاہی سیشن منعقد کیا گیا، جس کی صدارت ڈائریکٹر نوید احمد شیخ نے کی۔

سیشن میں بتایا گیا کہ موسمیاتی تبدیلیوں کے باعث بلوچستان میں گرمی کی شدت میں مسلسل اضافہ ہو رہا ہے، جبکہ صوبے کے مختلف اضلاع بشمول سبی، تربت اور دالبندین میں حالیہ برسوں کے دوران درجہ حرارت 45 سے 51 ڈگری سینٹی گریڈ تک ریکارڈ کیا گیا ہے، جس سے انسانی صحت، زراعت اور آبی وسائل متاثر ہو رہے ہیں۔

پی ڈی ایم اے حکام نے کہا کہ ہیٹ ویو کے بڑھتے ہوئے خطرات سے نمٹنے کے لیے قبل از وقت وارننگ سسٹم کو مضبوط بنانے، طبی سہولیات کی دستیابی، عوامی آگاہی مہمات اور متعلقہ اداروں کے درمیان مؤثر رابطے کو مزید بہتر کرنے کی ضرورت ہے۔

سیشن میں عوام سے اپیل کی گئی کہ وہ شدید گرمی کے دوران احتیاطی تدابیر اختیار کریں، غیر ضروری طور پر دھوپ میں نکلنے سے گریز کریں اور پانی کا زیادہ استعمال یقینی بنائیں۔

پی ڈی ایم اے بلوچستان نے اس عزم کا اظہار کیا کہ موسمیاتی تبدیلیوں کے اثرات سے نمٹنے اور عوام کے تحفظ کے لیے تمام متعلقہ اداروں کے ساتھ مل کر مؤثر اقدامات جاری رکھے جائیں گے۔