بلوچستان میں موسمیاتی تحفظ کے لیے ماحولیاتی نظام پر مبنی اقدامات ناگزیر قرار

کوئٹہ: ری چارج پاکستان پراجیکٹ کے تحت ماحولیاتی نظام پر مبنی موافقت (Ecosystem-Based Adaptation) اور گرین انفراسٹرکچر کے موضوع پر ایک ورکشاپ منعقد ہوئی جس میں سرکاری حکام، ماہرین ماحولیات اور مختلف شعبوں سے تعلق رکھنے والے شراکت داروں نے شرکت کی۔ ورکشاپ میں بلوچستان میں موسمیاتی تبدیلیوں کے بڑھتے ہوئے اثرات اور ماحولیاتی تنزلی سے نمٹنے کے لیے پائیدار حکمت عملیوں پر تبادلہ خیال کیا گیا۔ورکشاپ سے خطاب کرتے ہوئے ڈپٹی ڈائریکٹر پی ڈی ایم اے بلوچستان اصغر علی جمالی نے ری چارج پاکستان پراجیکٹ کے نفاذ میں ادارے کے کردار اور اقدامات پر روشنی ڈالی۔ انہوں نے کہا کہ ماحولیاتی نظام پر مبنی موافقت اور گرین انفراسٹرکچر موسمیاتی تبدیلیوں کے اثرات کم کرنے، قدرتی آفات کے خطرات میں کمی لانے اور صوبے میں موسمیاتی مزاحمت بڑھانے کے لیے مؤثر ذرائع ہیں۔انہوں نے کہا کہ بلوچستان کو خشک سالی، سیلاب، زمین کے انحطاط اور دیگر ماحولیاتی چیلنجز کا سامنا ہے، جن سے نمٹنے کے لیے شجرکاری مہمات اور ماحولیات کے تحفظ سے متعلق اقدامات ناگزیر ہیں۔ ان کا کہنا تھا کہ جنگلات کے رقبے میں اضافہ صوبے کو موسمیاتی تبدیلیوں کے منفی اثرات سے محفوظ بنانے میں اہم کردار ادا کر سکتا ہے۔

اصغر علی جمالی نے حکومتی اداروں، مقامی آبادی، سول سوسائٹی اور دیگر شراکت داروں پر زور دیا کہ وہ ماحول دوست اقدامات اور قدرتی وسائل کے تحفظ کے لیے مشترکہ کوششیں کریں تاکہ آنے والی نسلوں کے لیے ایک محفوظ اور پائیدار ماحول یقینی بنایا جا سکے۔

ورکشاپ کے اختتام پر کنزرویٹر جنگلات ارز محمد نے شرکاء کی فعال شرکت اور تجاویز کو سراہتے ہوئے کہا کہ ماحولیاتی نظام پر مبنی موافقت اور گرین انفراسٹرکچر کے فروغ سے بلوچستان کو موسمیاتی تبدیلیوں کے چیلنجز سے نمٹنے اور ایک زیادہ محفوظ و پائیدار مستقبل کی جانب پیش رفت میں مدد ملے گی۔