بلوچستان میں بڑھتی آبادی پر قابو پانے کے لیے علما اور کمیونٹی رہنماؤں کے کردار پر زور

کوئٹہ: بلوچستان میں بڑھتی ہوئی آبادی کے چیلنج سے نمٹنے کے لیے علما کرام، کمیونٹی رہنماؤں اور تمام متعلقہ فریقین کے مشترکہ کردار کی ضرورت پر زور دیا گیا ہے۔

اس بات کا اظہار فیملی پلاننگ 2023 ورکنگ گروپ کے مشاورتی اجلاس میں کیا گیا، جس کا مشترکہ اہتمام محکمہ بہبود آبادی، حکومت بلوچستان اور اقوام متحدہ کے ادارہ برائے آبادی (یو این ایف پی اے) نے کیا۔

اجلاس میں صوبے میں آبادی میں تیزی سے اضافے سے نمٹنے کے لیے حکمت عملیوں کا جائزہ لیا گیا۔ اس موقع پر بتایا گیا کہ خاندانی منصوبہ بندی سے متعلق اشیا بلوچستان کے تمام اضلاع تک پہنچا دی گئی ہیں جبکہ آئندہ مالی سال میں محکمہ کی کارکردگی بہتر بنانے اور خدمات تک رسائی بڑھانے کے لیے خاطر خواہ فنڈز مختص کیے گئے ہیں۔

اجلاس کو آگاہ کیا گیا کہ یو این ایف پی اے کے تعاون سے مرد و خواتین عملے کو الیکٹرانک کلائنٹ ریکارڈ (ECR) موبائل ایپلی کیشن کے استعمال کی تربیت دی گئی ہے، جبکہ اضلاع کی سطح پر تربیت کے دائرہ کار کو وسعت دینے کے لیے نو ماسٹر ٹرینرز بھی تیار کیے گئے ہیں۔

شرکا نے اس بات پر زور دیا کہ خاندانی منصوبہ بندی سے متعلق آگاہی بڑھانے اور بنیادی سطح پر خدمات کی فراہمی کے لیے علما کرام، کمیونٹی موبلائزرز اور مقامی انتظامی نمائندوں کو مؤثر انداز میں شامل کیا جا رہا ہے۔

یو این ایف پی اے کے حکام نے بلوچستان حکومت، محکمہ بہبود آبادی اور محکمہ صحت کے ساتھ تعاون جاری رکھنے کے عزم کا اعادہ کرتے ہوئے کہا کہ خاندانی منصوبہ بندی کی سہولیات اور آگاہی کو ہر طبقے اور ہر علاقے تک پہنچانے کے لیے ہر ممکن معاونت فراہم کی جائے گی۔