بلوچستان میں بارش اور برفباری کی پیشگوئی، محکمہ موسمیات کا الرٹ جاری
محکمہ موسمیات کے مطابق 19 جنوری کی شام سے مغربی ہواؤں کا نیا سلسلہ بلوچستان میں داخل ہوگا، جس کے باعث مختلف اضلاع میں بارش، ژالہ باری اور پہاڑی علاقوں میں برفباری کا امکان ہے۔ 21 سے 23 جنوری کے دوران کوئٹہ اور زیارت میں شدید برفباری جبکہ شمالی و وسطی بلوچستان میں درجہ حرارت میں نمایاں کمی متوقع ہے۔ مسافروں کو غیر ضروری سفر سے گریز کی ہدایت جاری کی گئی ہے۔
رپورٹ: سیدہ نتاشا
کوئٹہ: محکمہ موسمیات نے بلوچستان کے مختلف اضلاع میں آئندہ ہفتے بارش اور برفباری کی پیشگوئی کرتے ہوئے الرٹ جاری کر دیا ہے۔ محکمہ موسمیات کے مطابق 19 جنوری کی شام سے مغربی ہواؤں کا نیا سسٹم صوبے میں داخل ہوگا، جس کے اثرات 23 جنوری تک برقرار رہنے کا امکان ہے۔
محکمہ موسمیات کا کہنا ہے کہ کوئٹہ، زیارت، چمن، پشین اور قلعہ عبداللہ میں بارش اور ژالہ باری جبکہ 21 سے 23 جنوری کے دوران کوئٹہ اور زیارت میں معتدل سے شدید برفباری متوقع ہے۔ شمالی اور وسطی بلوچستان میں اس دوران درجہ حرارت میں نمایاں کمی کا بھی امکان ظاہر کیا گیا ہے۔
مزید بتایا گیا ہے کہ ژوب، ہرنائی، لورالائی اور قلعہ سیف اللہ میں بارش اور برفباری کے باعث سڑکیں پھسلن کا شکار ہو سکتی ہیں، جبکہ پہاڑی علاقوں میں لینڈ سلائیڈنگ اور مڈ فلو کا خدشہ ہے۔
محکمہ موسمیات نے مسافروں کو غیر ضروری سفر سے گریز کرنے کی ہدایت کی ہے، جبکہ خضدار، پنجگور، کیچ، گوادر اور لسبیلہ میں ہلکی سے معتدل بارش متوقع ہے۔ پی ڈی ایم اے اور متعلقہ اداروں کو ممکنہ صورتحال کے پیش نظر الرٹ رہنے کی ہدایت جاری کر دی گئی ہے۔
Related News
.jpeg)
