آل کوئٹہ بلوچستان سپورٹس بورڈ فٹسال ٹورنامنٹ کا آغاز
محکمہ کھیل حکومتِ بلوچستان کے زیرِ اہتمام آل کوئٹہ بلوچستان سپورٹس بورڈ فٹسال ٹورنامنٹ کا افتتاح صوبائی مشیر کھیل و امورِ نوجوانان مینا مجید بلوچ نے کیا۔ ٹورنامنٹ میں تقریباً 400 ٹیمیں حصہ لے رہی ہیں اور یہ 15 دن تک کوئٹہ کے مختلف مقامات پر جاری رہے گا۔
رپورٹ: محمد خان کاکڑ
بلوچستان سپورٹس بورڈ فٹسال ٹورنامنٹ کا باقاعدہ آغاز ہو گیا۔ ٹورنامنٹ کا افتتاح صوبائی مشیر کھیل و امورِ نوجوانان بلوچستان مینا مجید بلوچ نے بال کو کِک لگا کر کیا۔ اس موقع پر سیکرٹری کھیل دُرا بلوچ بھی ان کے ہمراہ موجود تھے۔
افتتاحی تقریب میں بلوچستان فٹبال ایسوسی ایشن کے صدر جمیل احمد سرپرہ، جنرل سیکرٹری ماسٹر امین اللہ، صادق بڑیچ، محیب اللہ کاکڑ، ماما سلطان، محمد صادق لانگو، عبدالحسین ہزارہ، منظور کرد، محمد نعمان، ہاشم لانگو، حاجی باقی سمیت دیگر معززین نے شرکت کی۔
میڈیا سے گفتگو کرتے ہوئے صوبائی مشیر کھیل مینا مجید بلوچ نے کہا کہ اس طرح کے ٹورنامنٹس کے انعقاد کا مقصد کھیلوں کے میدانوں کو آباد رکھنا اور نوجوان کھلاڑیوں کو مثبت سرگرمیوں میں مصروف رکھنا ہے۔ انہوں نے بتایا کہ کوئٹہ میں اس وقت ٹیپ بال کرکٹ ٹورنامنٹ بھی جاری ہے جس میں ڈیڑھ سو سے زائد ٹیمیں حصہ لے رہی ہیں، جبکہ فٹسال ٹورنامنٹ میں تقریباً چار سو ٹیموں کی شرکت اس بات کا ثبوت ہے کہ نوجوان کھیلوں میں بھرپور دلچسپی رکھتے ہیں۔
انہوں نے مزید کہا کہ اسکولوں اور کالجوں کی چھٹیوں کے دوران بچوں اور نوجوانوں کو صحت مند سرگرمیاں فراہم کی جا رہی ہیں۔ اسی ماہ میراتھن ریس کا بھی انعقاد کیا جائے گا جس کی رجسٹریشن کا عمل جاری ہے اور اس میں ہر شہری شرکت کر سکتا ہے۔
افتتاحی نمائشی میچ اے کے ایف سی کوئٹہ اور نیمسو ہزارہ فٹبال کلب کے درمیان کھیلا گیا جو سنسنی خیز مقابلے کے بعد 5،5 گول سے برابر رہا۔ آل کوئٹہ بلوچستان سپورٹس بورڈ فٹسال ٹورنامنٹ آئندہ 15 دن تک جاری رہے گا، جبکہ کوئٹہ کے آٹھ مختلف مقامات پر روزانہ کی بنیاد پر میچز کھیلے جائیں گے۔
Related News
.jpeg)
.jpeg)