حکومت بلوچستان اور ویژن فار ایجوکیشن فاؤنڈیشن کے درمیان مفت کارنیا ٹرانسپلانٹ کے لیے معاہدہ

کوئٹہ: حکومتِ بلوچستان اور ویژن فار ایجوکیشن فاؤنڈیشن کے درمیان کارنیا ٹرانسپلانٹ کے مریضوں کو مفت علاج کی فراہمی کے لیے مفاہمتی یادداشت (ایم او یو) پر دستخط کر دیے گئے۔ تقریب صوبائی وزیر صحت بلوچستان بخت محمد کاکڑ کی موجودگی میں منعقد ہوئی۔

تقریب میں سیکرٹری صحت بلوچستان مجیب الرحمٰن پانیزئی، ایم ایس ہیلپر ہسپتال کوئٹہ ڈاکٹر اسحاق پانیزئی، ڈاکٹر امل پانیزئی، ڈاکٹر افضل مندوخیل، کارنیا ٹرانسپلانٹ پروگرام کے سربراہ ڈاکٹر مہتاب مینگل، ویژن فار ایجوکیشن فاؤنڈیشن کے صدر ناظم رجانی اور ڈائریکٹر ابرار حسین سمیت دیگر متعلقہ حکام نے شرکت کی۔

معاہدے کا مقصد بلوچستان میں کارنیا ٹرانسپلانٹ کے منتظر مریضوں کو مفت اور معیاری علاج فراہم کرنا ہے۔ حکام کے مطابق اس وقت صوبے میں 900 سے زائد مریض رجسٹرڈ ہیں، جن میں بڑی تعداد ایسے افراد کی ہے جو مالی مشکلات کے باعث علاج سے محروم ہیں۔

ایم او یو کے تحت ویژن فار ایجوکیشن فاؤنڈیشن ہر ماہ 25 کارنیا فراہم کرے گی، جبکہ کارنیا ٹرانسپلانٹ، ادویات، علاج اور ایک سال تک فالو اَپ کے تمام اخراجات بھی برداشت کرے گی۔ اس اقدام سے مستحق مریضوں کو لاکھوں روپے مالیت کی طبی سہولیات بلا معاوضہ فراہم کی جائیں گی۔

تقریب کے اختتام پر حکومتِ بلوچستان اور ویژن فار ایجوکیشن فاؤنڈیشن نے اس عزم کا اظہار کیا کہ باہمی تعاون کے ذریعے کارنیا ٹرانسپلانٹ کے منتظر مریضوں کو بروقت، معیاری اور مفت علاج کی سہولت فراہم کی جائے گی تاکہ وہ دوبارہ بینائی کی نعمت سے مستفید ہو سکیں۔

Keywords : Cornea Transplant, Balochistan Health Department, Vision for Education Foundation, Free Eye Treatment