نیشنل جونیئر کراٹے چیمپئن شپ: بلوچستان نے 7 گولڈ میڈلز جیت کر میدان مار لیا

پشاور میں منعقدہ نیشنل جونیئر کراٹے چیمپئن شپ میں بلوچستان کے کھلاڑیوں نے شاندار کارکردگی کا مظاہرہ کرتے ہوئے 7 گولڈ میڈلز جیت لیے۔ گرلز اور بوائز دونوں کیٹیگریز میں پہلی پوزیشن حاصل کر کے بلوچستان نے اپنی برتری ثابت کر دی۔

رپورٹ: محمد خان کاکڑ

کوئٹہ: پشاور میں 7 سے 9 جون تک منعقد ہونے والی نیشنل جونیئر کراٹے چیمپئن شپ میں بلوچستان کے کھلاڑیوں نے شاندار کارکردگی کا مظاہرہ کرتے ہوئے مجموعی طور پر 7 گولڈ میڈلز اپنے نام کر لیے۔

چیمپئن شپ کے مختلف مقابلوں میں بلوچستان کے نوجوان کھلاڑی نمایاں رہے۔ 61 کلوگرام کیٹیگری میں مصطفیٰ کاسی نے گولڈ میڈل جبکہ ارمان کاکڑ نے سلور میڈل حاصل کیا۔ 55 کلوگرام کیٹیگری میں اویس مینگل نے سندھ کے حریف کو شکست دے کر گولڈ میڈل جیتا۔

اسی طرح وماما ولی کاکڑ اور بلال ہزارہ نے بھی اپنی اپنی کیٹیگریز میں گولڈ میڈلز حاصل کیے۔

خواتین کے مقابلوں میں بلوچستان کی کھلاڑیوں نے غیر معمولی کارکردگی دکھاتے ہوئے 6 میں سے 4 گولڈ میڈلز جیتے، جبکہ بوائز ایونٹس میں بلوچستان کے کھلاڑیوں نے 6 میں سے 3 گولڈ میڈلز اپنے نام کیے۔ یوں بلوچستان نے مجموعی طور پر 7 گولڈ میڈلز کے ساتھ چیمپئن شپ میں پہلی پوزیشن حاصل کی۔

گرلز اور بوائز دونوں کیٹیگریز میں پہلی پوزیشن حاصل کرنا بلوچستان کے لیے ایک اہم کامیابی قرار دی جا رہی ہے۔

دریں اثنا، بلوچستان کے کراٹے کوچ آغا محمد مینگل نے لیول ون اور لیول ٹو کوچنگ کورسز کے ساتھ ریفری کورس بھی کامیابی سے مکمل کر لیا، جسے صوبے میں کراٹے کے فروغ کی جانب ایک مثبت پیش رفت قرار دیا جا رہا ہے۔