فیفا ورلڈ کپ 2026: فرانس اور اسپین سیمی فائنل میں پہنچ گئے

فرانس اور اسپین نے اپنے اپنے کوارٹر فائنل میچز جیت کر فیفا ورلڈ کپ 2026 کے سیمی فائنل کے لیے کوالیفائی کر لیا ہے، جہاں دونوں ٹیمیں ایک دوسرے کے مدمقابل ہوں گی۔ آج انگلینڈ کا مقابلہ ناروے جبکہ دفاعی چیمپئن ارجنٹینا کا سامنا سوئٹزرلینڈ سے ہوگا، جن کی فاتح ٹیمیں دوسرے سیمی فائنل میں جگہ بنائیں گی۔

فیفا ورلڈ کپ 2026 فیصلہ کن مرحلے میں داخل ہو گیا ہے، جہاں فرانس اور اسپین اپنے اپنے کوارٹر فائنل میچ جیت کر سیمی فائنل میں جگہ بنانے والی پہلی دو ٹیمیں بن گئی ہیں۔

اسپین نے بیلجیئم کو سنسنی خیز مقابلے کے بعد 2-1 سے شکست دی۔ میکل میرینو نے 88ویں منٹ میں فیصلہ کن گول کر کے اپنی ٹیم کو سیمی فائنل میں پہنچایا، جہاں اس کا مقابلہ فرانس سے ہوگا۔

فرانس نے کوارٹر فائنل میں مراکش کو شکست دے کر آخری چار ٹیموں میں جگہ بنائی تھی، جس کے بعد اب فرانس اور اسپین کے درمیان سیمی فائنل ٹورنامنٹ کے سب سے بڑے مقابلوں میں سے ایک تصور کیا جا رہا ہے۔

دوسری جانب آج 11 جولائی کو باقی دو کوارٹر فائنل میچز کھیلے جائیں گے، جن میں انگلینڈ کا مقابلہ ناروے سے جبکہ دفاعی چیمپئن ارجنٹینا کا سامنا سوئٹزرلینڈ سے ہوگا۔ ان دونوں میچوں کی فاتح ٹیمیں دوسرے سیمی فائنل میں ایک دوسرے کے مدمقابل آئیں گی۔

انگلینڈ کے ہیڈ کوچ تھامس ٹوخل نے ناروے کے خلاف اہم میچ سے قبل کہا ہے کہ معطل دفاعی کھلاڑی جیرل کوانسہ کے علاوہ تقریباً تمام کھلاڑی مکمل فٹ ہیں اور انتخاب کے لیے دستیاب ہوں گے، جس سے ٹیم کو ناک آؤٹ مرحلے میں اہم تقویت ملے گی