حکومتِ بلوچستان کے زیرِ اہتمام ٹیپ بال کرکٹ ٹورنامنٹ شاندار انداز میں اختتام پذیر

محکمہ کھیل و امورِ نوجوانان حکومتِ بلوچستان کے زیرِ اہتمام ٹیپ بال کرکٹ ٹورنامنٹ کامیابی سے اختتام پذیر ہو گیا، جس میں کوئٹہ بھر سے 148 ٹیموں نے شرکت کی۔ فائنل میچ میں شہید عبدلالی کرکٹ کلب نے شاندار کارکردگی کا مظاہرہ کرتے ہوئے فتح حاصل کی، جبکہ سیکرٹری کھیل درا بلوچ نے کھلاڑیوں میں انعامات تقسیم کیے۔

رپورٹ: محمد خان کاکڑ

محکمہ کھیل و امورِ نوجوانان حکومتِ بلوچستان کے زیرِ اہتمام ٹیپ بال کرکٹ کے سلسلے میں منعقدہ شاندار کرکٹ ٹورنامنٹ اختتام پذیر ہو گیا۔ ٹورنامنٹ میں کوئٹہ بھر سے مجموعی طور پر 148 ٹیموں نے شرکت کی، جبکہ کوارٹر فائنلز، سیمی فائنلز اور فائنل میچز بگٹی کرکٹ گراؤنڈ کوئٹہ میں کھیلے گئے۔
ٹورنامنٹ کا فائنل میچ شہید عبدلالی کرکٹ کلب اور الیاس زلمی کرکٹ کلب کے درمیان کھیلا گیا، جس میں اے بی پارو کی شاندار بیٹنگ کی بدولت شہید عبدلالی کرکٹ کلب نے کامیابی حاصل کی اور ٹورنامنٹ اپنے نام کیا۔
فائنل میچ کے مہمانِ خصوصی سیکرٹری کھیل بلوچستان درا بلوچ تھے، جنہوں نے جیتنے والی ٹیم کو تین لاکھ روپے نقد انعام جبکہ رنر اپ ٹیم کو دو لاکھ روپے نقد انعام سے نوازا۔

اس موقع پر خطاب کرتے ہوئے سیکرٹری کھیل درا بلوچ نے کہا کہ نوجوانوں میں کھیلوں کے فروغ کے لیے محکمہ کھیل بھرپور اقدامات کر رہا ہے۔ انہوں نے اعلان کیا کہ آئندہ آل بلوچستان ٹیپ بال کرکٹ ٹورنامنٹ اور آل پاکستان ٹیپ بال کرکٹ ٹورنامنٹ کا انعقاد کیا جائے گا۔
انہوں نے مزید کہا کہ گوادر میں جلد گوادر اسپورٹس فیسٹیول منعقد کیا جائے گا، جبکہ نیشنل گیمز میں بہترین کارکردگی دکھانے والے کھلاڑیوں کو بھی نقد انعامات دیے جائیں گے۔