گوادر میں فیفا ورلڈ کپ اسکریننگ، شائقین کے لیے بڑی اسکرینوں کا خصوصی انتظام

گوادر میں فیفا ورلڈ کپ 2026 کے موقع پر مختلف مقامات پر بڑی اسکرینیں اور جدید ساؤنڈ سسٹم نصب کیے گئے ہیں۔ یہ اقدام نوجوانوں کو مثبت سرگرمیوں کی طرف راغب کرنے اور کھیلوں کے فروغ کے لیے کیا گیا ہے۔

رپورٹ :شریف ابراہیم
دنیا کے سب سے بڑے فٹبال ایونٹ فیفا ورلڈ کپ 2026 کے موقع پر گوادر میں کھیلوں کا جوش و خروش عروج پر پہنچ گیا ہے، جہاں نِجی ٹرانسپورٹ کے مالک اور ایک سماجی شخصیت نے اپنی ذاتی خرچ پر شہر کے مختلف مقامات پر بڑی اسکرینوں، جدید ساؤنڈ سسٹم اور پروجیکٹرز کا خصوصی انتظام کیا ہے تاکہ فٹبال شائقین عالمی مقابلوں سے بھرپور لطف اندوز ہو سکیں۔

اس سلسلے میں میرین ڈرائیو، نیو ٹاؤن جی ڈی اے پارک، فقیر کالونی اور بی اینڈ آر والی بال گراؤنڈ میں بڑی اسکرینیں نصب کی گئی ہیں، جہاں روزانہ سینکڑوں شائقین فیفا ورلڈ کپ 2026 کے دلچسپ میچز براہِ راست دیکھ رہے ہیں۔

منتظم کا کہنا ہے کہ اس اقدام کا مقصد نوجوانوں کو کھیلوں اور مثبت سرگرمیوں کی جانب راغب کرنا ہے تاکہ وہ منشیات اور دیگر سماجی برائیوں سے دور رہیں۔ انہوں نے کہا کہ کھیل نوجوانوں کی صلاحیتوں کو نکھارنے اور ایک صحت مند معاشرے کی تشکیل میں اہم کردار ادا کرتے ہیں، جبکہ ورلڈ کپ کی اسکریننگ فائنل میچ تک جاری رہے گی۔

گوادر کے عوام اور اسپورٹس برادری نے اس اقدام کو سراہتے ہوئے امید ظاہر کی ہے کہ مستقبل میں بھی کھیلوں کے فروغ اور نوجوانوں کی فلاح و بہبود کے لیے ایسے مثبت اقدامات جاری رہیں گے۔