پاکستان اور چین کا سی پیک 2.0، مصنوعی ذہانت اور ڈیجیٹل معیشت میں تعاون مزید بڑھانے پر اتفاق

نائب وزیراعظم و وزیر خارجہ اسحاق ڈار اور چینی وزیر خارجہ وانگ ای نے شنگھائی میں ملاقات کے دوران پاک چین اسٹریٹجک شراکت داری مزید مضبوط بنانے کے عزم کا اعادہ کیا۔ دونوں رہنماؤں نے سی پیک 2.0، تجارت، سرمایہ کاری، سائنس و ٹیکنالوجی، ڈیجیٹل معیشت اور مصنوعی ذہانت کے شعبوں میں تعاون بڑھانے پر اتفاق کیا۔

شنگھائی: نائب وزیراعظم و وزیر خارجہ سینیٹر محمد اسحاق ڈار نے چین کے وزیر خارجہ وانگ ای سے شنگھائی میں ورلڈ آرٹیفیشل انٹیلی جنس کوآپریشن آرگنائزیشن (وائیکو) کے موقع پر دوطرفہ ملاقات کی، جس میں پاک چین تعلقات، سی پیک، تجارت، سرمایہ کاری اور مصنوعی ذہانت سمیت مختلف شعبوں میں تعاون بڑھانے پر اتفاق کیا گیا۔

ملاقات میں وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ، وزیراعلیٰ پنجاب کے مشیر برائے مصنوعی ذہانت و خصوصی اقدامات علی مصطفیٰ ڈار، پاکستان ورچوئل اثاثہ جات ریگولیٹری اتھارٹی (پی وی اے آر اے) کے چیئرمین بلال بن ثاقب، وزارت خارجہ کے ایڈیشنل سیکریٹری (ایشیا پیسیفک) ڈاکٹر سید اسد علی گیلانی اور چین میں پاکستان کے ناظم الامور اعزاز خان بھی شریک تھے۔

دونوں وزرائے خارجہ نے پاک چین دوطرفہ تعلقات کا تفصیلی جائزہ لیا اور باہمی شراکت داری کی مضبوطی اور مسلسل پیش رفت پر اطمینان کا اظہار کیا۔ دونوں رہنماؤں نے پاک چین آل ویدر اسٹریٹجک کوآپریٹو پارٹنرشپ کو مزید مضبوط بنانے کے عزم کا اعادہ کیا۔

ملاقات میں سی پیک 2.0 کے تحت اعلیٰ معیار کی ترقی کی اہمیت پر زور دیتے ہوئے تجارت، سرمایہ کاری، سائنس و ٹیکنالوجی، ڈیجیٹل معیشت اور مصنوعی ذہانت کے شعبوں میں عملی تعاون اور باہمی اشتراک کو مزید فروغ دینے پر اتفاق کیا گیا۔

دونوں رہنماؤں نے خطے اور دنیا کی تازہ ترین صورتحال پر بھی تبادلہ خیال کیا اور باہمی دلچسپی کے امور پر قریبی رابطے، مسلسل مشاورت اور کثیرالجہتی فورمز پر تعاون جاری رکھنے کے عزم کا اظہار کیا۔

ملاقات میں اس بات پر بھی زور دیا گیا کہ پاکستان اور چین ابھرتی ہوئی ٹیکنالوجیز اور جدت پر مبنی ترقی کے شعبوں میں اپنی اسٹریٹجک شراکت داری کو مزید وسعت دینے کے لیے مل کر کام جاری رکھیں گے۔