اے این ایف کا منشیات اسمگلنگ کے خلاف بھرپور کریک ڈاؤن

انسداد منشیات فورس (اے این ایف) نے بلوچستان کے مختلف علاقوں میں کامیاب کارروائیاں کرتے ہوئے بھاری مقدار میں منشیات برآمد کر لی۔ کارروائیوں کے بعد انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔

رپورٹ: سیدہ نتاشا

انسدادِ منشیات فورس (اے این ایف) نے منشیات اسمگلنگ کے خلاف جاری کریک ڈاؤن کے دوران بلوچستان کے مختلف علاقوں میں کامیاب کارروائیاں کیں۔ پہلی کارروائی کلی شادزئی سرنان، ضلع پشین کے قریب کی گئی، جہاں سے 1500 کلوگرام چرس گردہ برآمد کی گئی۔

دوسری کارروائی گوٹھ شیر خان، ضلع حب میں عمل میں لائی گئی، جہاں جھاڑیوں میں چھپائی گئی 31 کلوگرام ہیروئن برآمد کر لی گئی۔ اے این ایف حکام کے مطابق دونوں کارروائیاں خفیہ اطلاع کی بنیاد پر کی گئیں۔
برآمد کی گئی منشیات کو تحویل میں لے لیا گیا ہے جبکہ متعلقہ افراد کے خلاف انسدادِ منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔ اے این ایف نے اس عزم کا اعادہ کیا ہے کہ منشیات کے ناسور کے خاتمے کے لیے کارروائیاں بلا امتیاز جاری رہیں گی۔