زیارت حملے کے شہداء کی نمازِ جنازہ ادا، سرکاری اعزاز کے ساتھ سپردِ خاک

زیارت دہشت گرد حملے میں شہید ہونے والے پولیس اہلکاروں کی نمازِ جنازہ ایوب اسٹیڈیم کوئٹہ میں ادا کی گئی، جس کے بعد انہیں سرکاری اعزاز کے ساتھ آبائی علاقوں میں سپردِ خاک کر دیا گیا۔ حکومت سے کامیاب مذاکرات کے بعد لواحقین کا 10 روزہ دھرنا ختم ہوا، جبکہ زیارت اور ہنہ اوڑک حملوں کی تحقیقات کے لیے جوڈیشل کمیشن قائم کرنے کا فیصلہ بھی کیا گیا۔

کوئٹہ: زیارت دہشت گرد حملے میں شہید ہونے والے پولیس اہلکاروں کی نمازِ جنازہ ایوب اسٹیڈیم کوئٹہ میں ہزاروں سوگواروں کی موجودگی میں ادا کی گئی، جس کے بعد شہداء کے جسدِ خاکی سرکاری اعزاز کے ساتھ ان کے آبائی علاقوں کو روانہ کر دیے گئے، جہاں انہیں سپردِ خاک کیا گیا۔

شہداء کے جسدِ خاکی شہدائے زیارت چوک (سابقہ کوئلہ پھاٹک چوک) سے بڑے جلوس کی صورت میں ایوب اسٹیڈیم لائے گئے۔ نمازِ جنازہ میں صوبائی وزراء، سیاسی رہنماؤں، قبائلی عمائدین، شہداء کے اہل خانہ اور شہریوں کی بڑی تعداد نے شرکت کی۔

یہ پیش رفت شہداء کے لواحقین کے 10 روزہ دھرنے کے خاتمے کے بعد سامنے آئی، جو حکومت بلوچستان کے ساتھ کامیاب مذاکرات کے نتیجے میں ختم ہوا۔ مذاکرات کے دوران حکومت نے لواحقین کے تمام مطالبات تسلیم کرتے ہوئے زیارت اور ہنہ اوڑک حملوں کی تحقیقات کے لیے جوڈیشل کمیشن قائم کرنے پر بھی اتفاق کیا۔

واضح رہے کہ زیارت حملے میں 27 پولیس اہلکار جبکہ ہنہ اوڑک حملے میں 5 شہری شہید ہوئے تھے۔ حکومت نے دونوں واقعات کی تحقیقات کے لیے عدالتی کمیشن تشکیل دینے کا اعلان کیا ہے۔