ماشکیل میں مزدوروں کے بہیمانہ قتل کی وزیراعلیٰ اور گورنر بلوچستان کی شدید مذمت

وزیراعلیٰ بلوچستان میر سرفراز بگٹی اور گورنر جعفر خان مندوخیل نے ماشکیل میں نہتے مزدوروں کے قتل کی شدید مذمت کرتے ہوئے اسے انسانیت، ریاست اور قومی یکجہتی پر حملہ قرار دیا۔ دونوں رہنماؤں نے دہشت گردوں کو انصاف کے کٹہرے میں لانے، متاثرہ خاندانوں سے اظہارِ ہمدردی اور دہشت گردی کے خلاف فیصلہ کن کارروائی جاری رکھنے کے عزم کا اظہار کیا۔

کوئٹہ: وزیراعلیٰ بلوچستان میر سرفراز بگٹی اور گورنر بلوچستان جعفر خان مندوخیل نے ضلع واشک کی تحصیل ماشکیل میں نہتے اور بے گناہ مزدوروں کے بہیمانہ قتل کی شدید الفاظ میں مذمت کرتے ہوئے اسے انسانیت، ریاست اور پاکستان کی وحدت پر حملہ قرار دیا ہے۔

وزیراعلیٰ بلوچستان میر سرفراز بگٹی نے اپنے بیان میں کہا کہ شہید ہونے والے صرف پنجابی مزدور نہیں تھے بلکہ وہ پاکستان کے شہری، محنت کش اور ہمارے اپنے بھائی تھے۔ انہوں نے کہا کہ معصوم شہریوں پر حملہ کسی ایک صوبے یا قومیت پر نہیں بلکہ پاکستان کی وحدت، آئین اور ریاست پر حملہ ہے۔

انہوں نے کہا کہ آزادی کی نام نہاد تحریک کا لبادہ اوڑھنے والے دہشت گرد نہتے مزدوروں کو نشانہ بنا کر اپنے مکروہ عزائم دنیا کے سامنے بے نقاب کر چکے ہیں۔ ان کا مقصد کسی حق کی جدوجہد نہیں بلکہ دہشت، نفرت، خونریزی اور پاکستان کو غیر مستحکم کرنا ہے۔

میر سرفراز بگٹی نے واضح کیا کہ ریاست دشمن عناصر اور ان کے سہولت کاروں کو کسی صورت معاف نہیں کیا جائے گا اور پاکستانی شہریوں کے خون کے ہر قطرے کا حساب لیا جائے گا۔ انہوں نے کہا کہ دہشت گردی میں ملوث ہر مجرم کو انجام تک پہنچایا جائے گا، ریاست کی رٹ پر حملہ کرنے والوں کے خلاف کارروائی مزید فیصلہ کن ہوگی، جبکہ پاکستان کی ریاست دہشت گردی کے سامنے نہ کبھی جھکی ہے اور نہ جھکے گی، آخری دہشت گرد کے خاتمے تک یہ جنگ پوری قوت کے ساتھ جاری رہے گی۔

دریں اثنا، گورنر بلوچستان جعفر خان مندوخیل نے بھی ماشکیل میں مزدوروں کے قتل پر گہرے دکھ اور افسوس کا اظہار کرتے ہوئے کہا کہ مزدور محض مزدور نہیں بلکہ اپنے پورے خاندان کا واحد کفیل اور سہارا ہوتا ہے، اور ایک مزدور کا نقصان اس کے اہل خانہ کے لیے شدید معاشی اور سماجی مشکلات کا باعث بنتا ہے۔

انہوں نے مزدوروں پر حملے کو ظالمانہ اور قابلِ مذمت قرار دیتے ہوئے کہا کہ غم کی اس گھڑی میں حکومت بلوچستان اور پوری قوم سوگوار خاندانوں کے ساتھ مکمل یکجہتی کا اظہار کرتی ہے۔