حکومتِ بلوچستان کا صوبے بھر میں دفعہ 144 نافذ کرنے کا فیصلہ

حکومتِ بلوچستان نے امن و امان کی صورتحال برقرار رکھنے کے لیے صوبے بھر میں دفعہ 144 نافذ کر دی ہے۔ اعلامیے کے مطابق اسلحہ کی نمائش، موٹر سائیکل کی ڈبل سواری، کالے شیشوں والی اور غیر رجسٹرڈ گاڑیوں کے استعمال، پانچ یا اس سے زائد افراد کے اجتماعات اور چہرہ ڈھانپنے پر پابندی عائد کر دی گئی ہے۔ یہ پابندیاں ایک ماہ تک نافذ العمل رہیں گی اور خلاف ورزی کی صورت میں قانونی کارروائی کی جائے گی۔

حکومتِ بلوچستان نے صوبے بھر میں دفعہ 144 نافذ، اسلحہ کی نمائش، ڈبل سواری اور اجتماعات پر پابندی

رپورٹ: عروبہ شہزاد

کوئٹہ میں حکومتِ بلوچستان کے محکمہ داخلہ نے صوبے بھر میں امن و امان کی صورتحال کو برقرار رکھنے کے لیے دفعہ 144 کے تحت متعدد پابندیاں عائد کر دی ہیں۔ اس حوالے سے یکم فروری 2026 کو جاری کردہ اعلامیے کے مطابق یہ پابندیاں فوری طور پر نافذ العمل ہوں گی اور ایک ماہ کی مدت تک برقرار رہیں گی۔محکمہ داخلہ کے حکم نامے کے مطابق صوبے بھر میں اسلحہ کی نمائش اور استعمال پر مکمل پابندی عائد کر دی گئی ہے۔ اس کے علاوہ موٹر سائیکل کی ڈبل سواری، گاڑیوں میں کالے شیشوں کا استعمال، غیر رجسٹرڈ گاڑیوں کی سڑکوں پر آمد و رفت بھی ممنوع قرار دی گئی ہے۔

حکم نامے میں کہا گیا ہے کہ پانچ یا اس سے زائد افراد کے اجتماعات، دھرنے، جلوس اور ریلیاں نکالنے پر بھی پابندی ہوگی۔ مزید برآں عوامی مقامات پر چہرہ ڈھانپنے، خصوصاً مفلر، ماسک یا کسی بھی ایسے ذریعے کے استعمال پر پابندی عائد کی گئی ہے جس سے شناخت ممکن نہ ہو۔یہ احکامات ایڈیشنل چیف سیکرٹری داخلہ کی جانب سے ضابطہ فوجداری 1898 کی دفعہ 144 کی ذیلی شق (6) کے تحت جاری کیے گئے ہیں۔ حکام کے مطابق ان اقدامات کا مقصد صوبے میں امن و استحکام کو یقینی بنانا ہے، جبکہ خلاف ورزی کرنے والوں کے خلاف قانونی کارروائی عمل میں لائی جائے گی۔