حکومت بلوچستان نوجوانوں کو جدید تقاضوں سے ہم آہنگ ہنر فراہم کرنے کے لیے مربوط اقدامات کر رہی ہے، وزیر اعلیٰ بلوچستان

وزیر اعلیٰ بلوچستان میر سرفراز بگٹی سے وفاقی وزیر برائے اوورسیز پاکستانی و ہیومن ریسورس ڈویلپمنٹ چوہدری سالک حسین نے ملاقات کی، جس میں نوجوانوں کی اسکل ڈویلپمنٹ، افرادی قوت کی تربیت اور بیرون ملک روزگار کے مواقع پر تبادلہ خیال کیا گیا۔ وزیر اعلیٰ نے چیف منسٹر یوتھ اسکلز ڈویلپمنٹ پروگرام کی پیش رفت سے آگاہ کیا جبکہ وفاقی وزیر نے مکمل تعاون کی یقین دہانی کرائی۔

رپورٹ: سیدہ نتاشا

وزیر اعلیٰ بلوچستان میر سرفراز بگٹی سے بدھ کے روز وفاقی وزیر برائے اوورسیز پاکستانی و ہیومن ریسورس ڈویلپمنٹ چوہدری سالک حسین نے ملاقات کی۔ ملاقات میں باہمی دلچسپی کے امور، بالخصوص نوجوانوں کی اسکل ڈویلپمنٹ، افرادی قوت کی تربیت اور بیرون ملک روزگار کے مواقع پر تفصیلی گفتگو کی گئی۔

اس موقع پر وزیر اعلیٰ بلوچستان نے وفاقی وزیر کو چیف منسٹر یوتھ اسکلز ڈویلپمنٹ پروگرام کے اغراض و مقاصد، پیش رفت اور مستقبل کی حکمت عملی سے آگاہ کرتے ہوئے کہا کہ حکومت بلوچستان صوبے کے نوجوانوں کو جدید تقاضوں سے ہم آہنگ ہنر فراہم کرنے کے لیے مربوط اور عملی اقدامات کر رہی ہے تاکہ انہیں باعزت روزگار کے بہتر مواقع میسر آ سکیں۔
میر سرفراز بگٹی نے کہا کہ مذکورہ پروگرام کے تحت نوجوانوں کو مقامی اور بین الاقوامی مارکیٹ کی ضروریات کے مطابق تربیت دی جا رہی ہے، جس کا مقصد نوجوانوں کو خود کفیل بنانا اور بیرون ملک روزگار کے مواقع سے بھرپور فائدہ اٹھانا ہے۔ انہوں نے مزید کہا کہ ہنرمند نوجوان نہ صرف اپنے خاندانوں کی معاشی حالت بہتر بنائیں گے بلکہ ملک کے لیے قیمتی زرِ مبادلہ کا ذریعہ بھی ثابت ہوں گے۔
وفاقی وزیر چوہدری سالک حسین نے بلوچستان حکومت کے اقدامات کو سراہتے ہوئے نوجوانوں کی فلاح و بہبود اور اسکل ڈویلپمنٹ کے لیے وفاقی حکومت کی جانب سے مکمل تعاون کی یقین دہانی کرائی۔ انہوں نے کہا کہ صوبوں اور وفاق کے باہمی اشتراک سے افرادی قوت کی ترقی کے اہداف کو مؤثر انداز میں حاصل کیا جا سکتا ہے۔
ملاقات میں اس بات پر بھی اتفاق کیا گیا کہ وفاقی اور صوبائی ادارے مل کر نوجوانوں کے لیے بیرون ملک روزگار کے مواقع میں اضافے، تربیتی پروگراموں کو مزید مؤثر بنانے اور ادارہ جاتی روابط کو مضبوط کرنے کے لیے مشترکہ اقدامات کریں گے۔