محرم الحرام کے دوران امن و امان کے لیے بلوچستان بھر میں دفعہ 144 نافذ

کوئٹہ: بلوچستان حکومت نے محرم الحرام کے دوران امن و امان کی صورتحال برقرار رکھنے اور ممکنہ بدامنی سے بچاؤ کے لیے صوبے بھر میں دفعہ 144 نافذ کر دی ہے۔

محکمہ داخلہ کی جانب سے جاری کردہ نوٹیفکیشن کے مطابق یہ پابندیاں یکم محرم سے 10 محرم تک نافذ العمل رہیں گی، جبکہ سیکیورٹی صورتحال کے مطابق ان میں رد و بدل یا توسیع کی جا سکتی ہے۔

نوٹیفکیشن میں کہا گیا ہے کہ فرقہ وارانہ، اشتعال انگیز اور نفرت انگیز مواد کی تیاری، اشاعت، ترسیل اور سوشل میڈیا سمیت کسی بھی ذریعے سے اس کی تشہیر پر مکمل پابندی ہوگی۔

اسی طرح اسلحہ اور گولہ بارود کی نمائش اور عوامی مقامات پر اس کا استعمال بھی ممنوع قرار دیا گیا ہے، تاہم قانون نافذ کرنے والے ادارے اپنی ڈیوٹی کے دوران اس پابندی سے مستثنیٰ ہوں گے۔

کوئٹہ میں اضافی سیکیورٹی اقدامات کے تحت موٹرسائیکل پر ڈبل سواری پر مکمل پابندی عائد کی گئی ہے، جبکہ بغیر اجازت لاؤڈ اسپیکر اور ساؤنڈ سسٹم کے استعمال اور نقل و حمل پر بھی پابندی ہوگی۔

محرم جلوسوں کے راستوں اور حساس مقامات کے اطراف غیر متعلقہ افراد کے چھتوں، بالکونیوں اور بلند مقامات پر جمع ہونے پر بھی پابندی ہوگی، جبکہ صرف رہائشیوں یا اجازت یافتہ افراد کو اجازت دی جائے گی۔

محکمہ داخلہ نے تمام ضلعی انتظامیہ، پولیس اور متعلقہ اداروں کو احکامات پر سختی سے عملدرآمد یقینی بنانے کی ہدایت کی ہے، جبکہ خلاف ورزی کرنے والوں کے خلاف قانونی کارروائی عمل میں لائی جائے گی۔