کوئٹہ میں بلوچستان پولیس کی 104ویں پاسنگ آؤٹ پریڈ، وزیر اعلیٰ بلوچستان کا پولیس کو مکمل تعاون کا اعلان.

رپورٹ: سیدہ نتاشا
 بلوچستان پولیس ٹریننگ سینٹر میں 104ویں پاسنگ آؤٹ پریڈ کی پروقار تقریب منعقد ہوئی جس میں وزیر اعلیٰ بلوچستان میر سرفراز بگٹی نے بطور مہمانِ خصوصی شرکت کی۔ تقریب میں آئی جی پولیس محمد طاہر، صوبائی وزراء، اراکین اسمبلی، سینئر پولیس افسران اور شہریوں کی بڑی تعداد شریک ہوئی۔
تقریب سے خطاب کرتے ہوئے وزیر اعلیٰ بلوچستان نے پاس آؤٹ ہونے والے پولیس اہلکاروں کو مبارکباد دی اور کہا کہ آج فارغ التحصیل ہونے والے جوانوں کے کندھوں پر شہریوں کے تحفظ کی بڑی ذمہ داری عائد ہوتی ہے۔ انہوں نے کہا کہ جس رات دہشت گردوں نے پولیس ٹریننگ سینٹر پر حملہ کیا، وہ سب سے پہلے موقع پر پہنچے اور آج بھی ان عظیم شہداء کی یاد دل کو بے چین کر دیتی ہے۔
میر سرفراز بگٹی نے کہا کہ دہشت گردوں کا پولیس ٹریننگ سینٹر بند کرنے کا خواب چکنا چور ہو چکا ہے اور آج یہاں نہ صرف جوان بلکہ ہماری بیٹیاں بھی تربیت حاصل کر رہی ہیں۔ انہوں نے کہا کہ کچھ عناصر بلوچ نوجوانوں کو لاحاصل جنگ کی طرف دھکیل رہے ہیں، مگر پولیس اہلکار دہشت گردوں کے سامنے سیسہ پلائی دیوار بن کر کھڑے ہیں۔
وزیر اعلیٰ نے کہا کہ سردار بہادر خان یونیورسٹی پر حملے کے بعد بھی داخلوں کی تعداد میں اضافہ ہوا، جو اس بات کا ثبوت ہے کہ دہشت گرد اپنے مقاصد میں ناکام ہو رہے ہیں۔ انہوں نے واضح کیا کہ ریاست پاکستان تاقیامت چٹان کی طرح کھڑی رہے گی۔
میر سرفراز بگٹی نے اعلان کیا کہ محکمہ پولیس میں وسائل کی کمی حکومت بلوچستان پوری کرے گی اور آئی جی پولیس کی جانب سے پیش کیے گئے تمام مطالبات منظور کیے جائیں گے۔ انہوں نے پولیس اہلکاروں کو ہدایت کی کہ چند پیسوں کی خاطر محکمہ پولیس کی عزت کو مٹی میں نہ ملائیں۔
وزیر اعلیٰ نے پولیس ٹریننگ سینٹر کالج میں ایک ماڈل گراؤنڈ بنانے اور 60 کے بجائے 80 رہائشی کوارٹرز تعمیر کرنے کا بھی اعلان کیا۔