بلوچستان یوتھ پالیسی 2024 کے نفاذ پر مشاورتی اجلاس، صوبائی مشیر مینا مجید بلوچ کی صدارت

رپورٹ: سیدہ نتاشا
کوئٹہ، صوبائی مشیر کھیل و ثقافت مینا مجید بلوچ کی زیر صدارت بلوچستان کی پہلی یوتھ پالیسی 2024 کے نفاذ، پلاننگ اور مانیٹرنگ اینڈ ایولیشن فریم ورک کے حوالے سے یو این ایف پی اے اور پارٹنر آرگنائزیشنز کے تعاون سے ایک اہم مشاورتی اجلاس منعقد ہوا
اجلاس میں مہمانِ خصوصی کے طور پر خطاب کرتے ہوئے صوبائی مشیر مینا مجید بلوچ نے کہا کہ تمام تر چیلنجز کے باوجود صوبہ بلوچستان کی پہلی یوتھ پالیسی کا قیام موجودہ مخلوط صوبائی حکومت اور وزیر اعلیٰ بلوچستان میر سرفراز بگٹی کی قیادت کا نتیجہ ہے۔ انہوں نے کہا کہ یوتھ پالیسی پر مؤثر عملدرآمد کے ذریعے صوبے کے نوجوانوں کو بہتر سمت فراہم کی جاسکتی ہے، جو مستقبل میں مضبوط اور بااختیار نوجوان نسل کی بنیاد رکھے گی۔
انہوں نے مزید کہا کہ صوبہ بلوچستان میں پبلک پرائیویٹ پارٹنرشپ کے ساتھ ساتھ مائنز اینڈ منرلز، ٹورازم، سپورٹس، کلچر، ایگریکلچر اور لائیو اسٹاک جیسے شعبوں میں نوجوانوں کے لیے روزگار اور ترقی کے بے شمار مواقع موجود ہیں۔ ان مواقع کو سٹریم لائن کرکے نہ صرف نوجوانوں کے لیے روزگار کے دروازے کھولے جاسکتے ہیں بلکہ صوبے کے لیے قیمتی زرمبادلہ بھی حاصل کیا جاسکتا ہے۔
اجلاس سے سیکرٹری سپورٹس درا بلوچ، یو این ایف پی اے بلوچستان کی سربراہ سعدیہ عطا اور دیگر شرکاء نے بھی خطاب کیا۔ انہوں نے کہا کہ نوجوان کسی بھی معاشرے کی اصل قوت ہوتے ہیں اور بلوچستان یوتھ پالیسی 2024 نوجوانوں کے لیے ایک واضح سمت اور لائحہ عمل فراہم کرے گی۔ انہوں نے اس عزم کا اظہار کیا کہ تمام ادارے مل کر اس اہم پالیسی کو کامیاب بنانے میں اپنا بھرپور کردار ادا کریں گے۔