سیکرٹری اسکول ایجوکیشن بلوچستان کی "لٹل سائنٹسٹ ڈے" نمائش میں شرکت، طالبات کی سائنسی صلاحیتوں کو سراہا

سیکرٹری اسکول ایجوکیشن بلوچستان لعل جان جعفر نے گورنمنٹ گرلز ہائی اسکول پولیس لائن، کوئٹہ میں منعقدہ "لٹل سائنٹسٹ ڈے" نمائش کا دورہ کرکے طالبات کے سائنسی منصوبوں اور تخلیقی صلاحیتوں کو سراہا۔ انہوں نے اسکول کے تعلیمی ماحول، صفائی اور انتظامی امور پر اطمینان کا اظہار کرتے ہوئے صوبے بھر میں سائنسی و تخلیقی سرگرمیوں کے فروغ کے عزم کا اعادہ کیا۔

کوئٹہ: سیکرٹری اسکول ایجوکیشن بلوچستان، لعل جان جعفر نے گورنمنٹ گرلز ہائی اسکول (جی جی ایچ ایس) پولیس لائن میں منعقدہ خصوصی تعلیمی نمائش "لٹل سائنٹسٹ ڈے" میں شرکت کی، جہاں انہوں نے طالبات کی جانب سے تیار کیے گئے مختلف سائنسی منصوبوں اور ماڈلز کا تفصیلی معائنہ کیا۔

اس موقع پر سیکرٹری اسکول ایجوکیشن نے طالبات کی اختراعی صلاحیتوں، تخلیقی سوچ اور سائنسی منصوبوں کو سراہتے ہوئے انہیں قابلِ تعریف قرار دیا۔ انہوں نے کہا کہ اس نوعیت کی سرگرمیاں طلبہ و طالبات میں تحقیق، تخلیقی صلاحیتوں اور سائنسی سوچ کو فروغ دینے میں اہم کردار ادا کرتی ہیں۔

بعد ازاں لعل جان جعفر نے اسکول کے مختلف کلاس رومز کا بھی دورہ کیا۔ انہوں نے اسکول میں صفائی ستھرائی کے اعلیٰ معیار، بہترین انتظامی امور اور مجموعی تعلیمی ماحول پر اطمینان کا اظہار کرتے ہوئے انتظامیہ اور تدریسی عملے کی کارکردگی کو سراہا۔

سیکرٹری اسکول ایجوکیشن نے اس عزم کا اعادہ کیا کہ محکمہ اسکول ایجوکیشن صوبے بھر میں معیاری تعلیم، سائنسی سرگرمیوں اور طلبہ کی ہمہ جہت صلاحیتوں کے فروغ کے لیے ایسے تعلیمی اقدامات کی حوصلہ افزائی جاری رکھے گا۔