بی بی آئی ایس ای نے نہم و دہم کے عملی امتحانات کا نیا طریقہ کار متعارف کرا دیا

بلوچستان بورڈ نے جماعت نہم اور دہم کے عملی امتحانات کے لیے نیا نظام متعارف کراتے ہوئے پریکٹیکل بیسڈ اسیسمنٹ اور سائنس پراجیکٹ کو امتحان کا حصہ بنا دیا۔ نیا طریقہ کار تعلیمی سیشن 2026 سے جماعت نہم میں داخلہ لینے والے طلبہ پر لاگو ہوگا، جبکہ پہلے سے رجسٹرڈ طلبہ کے لیے پرانا نظام برقرار رہے گا۔

کوئٹہ: بلوچستان بورڈ آف انٹرمیڈیٹ اینڈ سیکنڈری ایجوکیشن نے جماعت نہم اور دہم کے طلبہ کے عملی امتحانا (پریکٹیکل) کے طریقہ کار میں اہم تبدیلی کا نوٹیفکیشن جاری کر دیا، جس کا اطلاق تعلیمی سیشن 2026 سے داخلہ لینے والے طلبہ پر ہوگا۔

نوٹیفکیشن کے مطابق عملی امتحان تین حصوں پر مشتمل ہوگا۔ متعلقہ سائنسی مضمون کے تھیوری پرچے کے ساتھ پریکٹیکل بیسڈ اسیسمنٹ (PBA) کے 6 نمبر، طلبہ کی پسندیدہ عملی سرگرمی (Favourite Practical of the Student) کے 2 نمبر، جبکہ اساتذہ کی نگرانی میں اسکول میں تیار کیے گئے سائنسی مظاہرے یا سائنس بیسڈ پراجیکٹ کے 7 نمبر مختص کیے گئے ہیں۔ اس طرح عملی امتحان کے کل نمبر 15 ہوں گے۔بورڈ کے مطابق نیا طریقہ کار صرف ان طلبہ پر لاگو ہوگا جو تعلیمی سیشن 2026 یا اس کے بعد جماعت نہم میں داخل ہوئے ہیں، جبکہ اس سے قبل رجسٹرڈ طلبہ کے عملی امتحانات سابقہ طریقہ کار کے مطابق ہی لیے جائیں گے۔نوٹیفکیشن میں تمام ضلعی تعلیمی افسران، اسکول سربراہان اور متعلقہ حکام کو ہدایت کی گئی ہے کہ نئے طریقہ کار پر مؤثر عمل درآمد کے لیے ضروری انتظامات یقینی بنائے جائیں۔