بلوچستان میں طالبات کے لیے 400 وظائف کا اہلیتی امتحان کامیابی سے منعقد

ایچ ای سی، محکمہ اسکول ایجوکیشن بلوچستان اور بلوچستان ایجوکیشن سپورٹ پروگرام کے اشتراک سے بی ایڈ اور بی ایس (ایجوکیشن) پروگراموں کے لیے 400 وظائف کا اہلیتی امتحان صوبے بھر میں شفاف انداز میں منعقد کیا گیا۔ امتحان میں ایک ہزار 694 طالبات نے شرکت کی، جبکہ سیکریٹری محکمہ اسکول ایجوکیشن لعل خان جعفر نے امتحانی انتظامات اور شفاف عمل کو سراہا۔

کوئٹہ: ہائر ایجوکیشن کمیشن (ایچ ای سی) کے ایجوکیشن ٹیسٹنگ کونسل (ای ٹی سی) نے محکمہ اسکول ایجوکیشن حکومت بلوچستان اور پروجیکٹ مینجمنٹ یونٹ، بلوچستان ایجوکیشن سپورٹ پروگرام (پی ایم یو-بی ای ایس پی) کے اشتراک سے چار سالہ بی ایڈ اور بی ایس (ایجوکیشن) پروگراموں میں داخلے کے خواہشمند طالبات کے لیے 400 وظائف کے حصول کا اہلیتی امتحان کامیابی سے منعقد کرایا۔

امتحان کے لیے مجموعی طور پر 3 ہزار 147 امیدواروں نے رجسٹریشن کرائی، جن میں سے ایک ہزار 694 طالبات نے بلوچستان بھر کے 14 امتحانی مراکز میں شرکت کی۔ امتحانی مراکز کوئٹہ، گوادر، تربت، خضدار، حب، ژوب، سبی اور دیگر شہروں میں قائم کیے گئے تھے۔

امتحان کو شفاف اور میرٹ کی بنیاد پر منعقد کرنے کے لیے معیاری طریقہ کار اپنایا گیا، جبکہ 253 نگران عملے اور 14 مانیٹرنگ افسران نے امتحانی عمل کی نگرانی کی۔

اس موقع پر سیکریٹری محکمہ اسکول ایجوکیشن بلوچستان لعل خان جعفر نے جامعہ بلوچستان، کوئٹہ میں قائم امتحانی مرکز کا دورہ کیا۔ انہوں نے امتحان کے شفاف، منظم اور پیشہ ورانہ انعقاد پر انتظامات کو سراہتے ہوئے متعلقہ اداروں کی کارکردگی کی تعریف کی۔

حکام کے مطابق صوبہ بھر میں اس کامیاب امتحان کا انعقاد بلوچستان کی طالبات کے لیے میرٹ کی بنیاد پر اعلیٰ تعلیم کے مواقع میں توسیع کی جانب ایک اہم پیش رفت ہے، جس سے مستقبل میں معیاری اساتذہ کی تیاری اور تعلیمی شعبے کو مزید مضبوط بنانے میں مدد ملے گی۔