وزیر اعلیٰ بلوچستان کا قائداعظمؒ کی 149ویں یومِ پیدائش پر خصوصی پیغام

وزیر اعلیٰ بلوچستان میر سرفراز بگٹی نے قائداعظم محمد علی جناحؒ کی 149ویں یومِ پیدائش کے موقع پر اپنے پیغام میں ایمان، اتحاد اور تنظیم کو قومی ترقی کی بنیاد قرار دیتے ہوئے نئی نسل کو قائداعظمؒ کے افکار اپنانے کی تلقین کی۔

رپورٹ: سیدہ نتاشا
وزیر اعلیٰ بلوچستان میر سرفراز بگٹی نے بابائے قوم قائداعظم محمد علی جناحؒ کی 149ویں یومِ پیدائش کے موقع پر اپنے خصوصی پیغام میں کہا ہے کہ قائداعظمؒ کے سنہری اصول ایمان، اتحاد اور تنظیم ہمارے قومی مستقبل کی مضبوط ضمانت ہیں۔ انہوں نے کہا کہ قائداعظمؒ کے نقشِ قدم پر چلتے ہوئے پاکستان کی عزت، سلامتی اور خوشحالی کے لیے ہمیں متحد ہو کر محنت کرنا ہوگی۔

وزیر اعلیٰ نے کہا کہ قائداعظمؒ نے دیانت، قانون کی بالادستی اور مساوات پر مبنی ریاست کا تصور دیا، جس پر عمل کرنا وقت کی اہم ضرورت ہے۔ ان کے مطابق بابائے قومؒ کی تعلیمات ہمیں اتحاد و یگانگت کے ساتھ قومی چیلنجز کا مقابلہ کرنے کا حوصلہ فراہم کرتی ہیں۔
میر سرفراز بگٹی نے کہا کہ قائداعظمؒ کا پاکستان تمام شہریوں کے لیے امن، برداشت اور انصاف کی علامت ہے، جبکہ نئی نسل کو قائداعظمؒ کے افکار سے روشناس کرانا ہم سب کی مشترکہ قومی ذمہ داری ہے۔ انہوں نے اس عزم کا اظہار کیا کہ قائداعظمؒ کے وژن کے مطابق ایک مضبوط، خودمختار اور خوشحال پاکستان کی تعمیر کے لیے حکومت بلوچستان پرعزم ہے۔