وزیراعلیٰ بلوچستان: آپریشن شعبان کامیابی سے جاری، 5 جولائی سے 75 دہشت گرد ہلاک

وزیراعلیٰ بلوچستان میر سرفراز بگٹی نے کہا ہے کہ منگی ڈیم حملے کے بعد جاری آپریشن شعبان میں اب تک 39 جبکہ 5 جولائی سے مختلف انٹیلی جنس بیسڈ آپریشنز میں مجموعی طور پر 75 دہشت گرد ہلاک کیے جا چکے ہیں۔ انہوں نے کہا کہ خضدار میں پولیس اسٹیشن پر حملہ ناکام بنا دیا گیا اور بلوچستان میں ریاست کی رٹ ہر قیمت پر برقرار رکھی جائے گی۔

کوئٹہ: وزیراعلیٰ بلوچستان میر سرفراز بگٹی نے کہا ہے کہ منگی ڈیم پولیس اسٹیشن پر دہشت گرد حملے کے بعد شروع کیا گیا آپریشن شعبان کامیابی سے آگے بڑھ رہا ہے۔ انہوں نے بتایا کہ دشوار گزار پہاڑی علاقوں میں پاک فوج، فرنٹیئر کور (ایف سی) اور بلوچستان پولیس کی مشترکہ زمینی و فضائی کارروائیوں کے نتیجے میں آپریشن شعبان کے دوران 39 دہشت گرد ہلاک کیے جا چکے ہیں، جبکہ 5 جولائی سے جاری مختلف انٹیلی جنس بیسڈ آپریشنز میں مجموعی طور پر 75 دہشت گرد مارے گئے ہیں۔

وزیراعلیٰ نے مزید بتایا کہ آج خضدار کے علاقے زیدی میں پولیس اسٹیشن پر دہشت گردوں کا حملہ بھی سیکیورٹی فورسز نے بروقت کارروائی کرتے ہوئے ناکام بنا دیا۔

میر سرفراز بگٹی نے اس عزم کا اظہار کیا کہ بلوچستان میں ریاست کی رٹ ہر قیمت پر برقرار رکھی جائے گی۔ انہوں نے کہا کہ دہشت گرد اپنے مذموم عزائم میں کبھی کامیاب نہیں ہوں گے اور قانون نافذ کرنے والے ادارے دہشت گردی کے مکمل خاتمے تک کارروائیاں جاری رکھیں گے۔