یومِ عاشور: وزیراعلیٰ بلوچستان اور کور کمانڈر کا سی پی او کوئٹہ کا دورہ، سکیورٹی انتظامات کا جائزہ

کوئٹہ: وزیر اعلیٰ بلوچستان میر سرفراز بگٹی اور کور کمانڈر بلوچستان لیفٹیننٹ جنرل راحت نسیم احمد خان نے 10 محرم الحرام کے موقع پر سنٹرل پولیس آفس کوئٹہ کا دورہ کیا اور ڈیٹا کمانڈ اینڈ کمیونیکیشن سینٹر سے صوبے کے مختلف اضلاع میں یومِ عاشور کے جلوسوں اور مجالس کی سکیورٹی صورتحال کا جائزہ لیا۔

اس موقع پر انسپکٹر جنرل پولیس بلوچستان محمد طاہر خان نے بریفنگ دیتے ہوئے بتایا کہ 9 اور 10 محرم الحرام کے دوران صوبے بھر میں امن و امان کے قیام کے لیے پولیس کے 32 ہزار اہلکار تعینات کیے گئے ہیں، جبکہ ایف سی بلوچستان اور دیگر قانون نافذ کرنے والے ادارے بھی پولیس کی معاونت کر رہے ہیں۔

وزیر اعلیٰ بلوچستان میر سرفراز بگٹی نے کہا کہ یومِ عاشور پر امن و امان کا قیام حکومت کی اولین ترجیح ہے اور عوام کے جان و مال کے تحفظ کے لیے تمام وسائل بروئے کار لائے جا رہے ہیں۔ انہوں نے کہا کہ محرم الحرام کے دوران پولیس، ایف سی، پاک فوج اور دیگر قانون نافذ کرنے والے اداروں کے درمیان مثالی ہم آہنگی صوبے بھر میں پرامن ماحول کے قیام کی ضمانت ہے۔

انہوں نے کہا کہ حضرت امام حسینؓ کی عظیم قربانی رہتی دنیا تک انسانیت کے لیے مشعلِ راہ ہے۔ وزیر اعلیٰ نے یومِ عاشور پر سکیورٹی ڈیوٹی انجام دینے والے پولیس، ایف سی اور دیگر قانون نافذ کرنے والے اداروں کے افسران و اہلکاروں کی خدمات کو خراجِ تحسین بھی پیش کیا۔