وزیرِ اعلیٰ بلوچستان کا ہنہ اُڑک میں نئی بلیک ٹاپ سڑک کا افتتاح

رپورٹ: سیدہ نتاشا
وزیرِ اعلیٰ بلوچستان میر سرفراز بگٹی نے حلقہ PB-39 کے علاقے ہنہ اُڑک میں نئی تعمیر شدہ بلیک ٹاپ سڑک کا شاندار افتتاح کر دیا، جو مقامی آبادی کی دیرینہ ضرورت اور علاقے کی ترقی کے لیے ایک اہم پیش رفت ہے۔
افتتاحی تقریب میں صوبائی وزیرِ صحت بخت محمد کاکڑ، سینئر صحافی سہیل وڑائچ، سی اینڈ ڈبلیو سیکریٹری لعل جان جعفر سمیت دیگر صوبائی وزراء اور حکومتی نمائندے موجود تھے۔ اس نئے منصوبے کو علاقے کے عوام کی سہولت اور بہتر انفراسٹرکچر کی جانب ایک مضبوط قدم قرار دیا جا رہا ہے۔
اس موقع پر وزیرِ اعلیٰ میر سرفراز بگٹی نے کہا کہ ہنہ اُڑک اور اس کے گردونواح کے علاقوں میں بنیادی ڈھانچے کی بحالی، سڑکوں کی بہتری اور عوامی سہولیات کی فراہمی حکومت کی اولین ترجیحات میں شامل ہیں۔ انہوں نے مزید بتایا کہ علاقے کی ترقی کے لیے مزید منصوبے بھی جلد شروع کیے جائیں گے۔
مقامی عوام نے نئی تعمیر شدہ سڑک کے افتتاح کا خیرمقدم کرتے ہوئے حکومت بلوچستان اور وزیرِ اعلیٰ کا شکریہ ادا کیا اور امید ظاہر کی کہ یہ منصوبہ علاقے کی معاشی سرگرمیوں اور روزمرہ سفری سہولیات میں نمایاں بہتری لائے گا۔