وزیراعلیٰ بلوچستان کا معروف کالم نگار ملک فدا الرحمٰن کے انتقال پر اظہارِ تعزیت

وزیراعلیٰ بلوچستان میر سرفراز بگٹی نے معروف کالم نگار، ادیب اور دانشور ملک فدا الرحمٰن (شفقؔ پتنیان) کے انتقال پر گہرے دکھ اور افسوس کا اظہار کیا۔ انہوں نے مرحوم کی علمی، ادبی اور صحافتی خدمات کو خراجِ تحسین پیش کرتے ہوئے لواحقین سے تعزیت اور ہمدردی کا اظہار کیا۔

کوئٹہ: وزیراعلیٰ بلوچستان میر سرفراز بگٹی نے معروف کالم نگار، ادیب، دانشور اور ادبی و ثقافتی تنظیم "آئینہ اسلام آباد" کے چیئرمین ملک فدا الرحمٰن (شفقؔ پتنیان) کے انتقال پر گہرے دکھ اور افسوس کا اظہار کیا ہے۔

اپنے تعزیتی بیان میں وزیراعلیٰ نے کہا کہ مرحوم کی وفات سے ادب، صحافت اور فکری حلقے ایک باوقار، مخلص اور صاحبِ فکر شخصیت سے محروم ہوگئے ہیں۔ انہوں نے کہا کہ ملک فدا الرحمٰن نے اپنی تحریروں، علمی خدمات اور ادبی سرگرمیوں کے ذریعے معاشرے میں مثبت سوچ، قومی شعور اور ادبی اقدار کے فروغ میں گراں قدر کردار ادا کیا۔

میر سرفراز بگٹی نے کہا کہ مرحوم کی علمی و ادبی خدمات ہمیشہ یاد رکھی جائیں گی اور ان کی کمی ادبی و صحافتی حلقوں میں طویل عرصے تک محسوس کی جائے گی۔

وزیراعلیٰ بلوچستان نے مرحوم کے اہل خانہ، عزیز و اقارب، دوستوں اور شاگردوں سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ مرحوم کو جوارِ رحمت میں اعلیٰ مقام عطا فرمائے، ان کی مغفرت فرمائے اور سوگوار خاندان کو یہ صدمہ صبر و استقامت کے ساتھ برداشت کرنے کی توفیق دے۔