نصیر آباد میں پانی کی قلت: وزیراعلیٰ بلوچستان اور وزیراعلیٰ سندھ کا مشترکہ اقدامات پر اتفاق

وزیراعلیٰ بلوچستان میر سرفراز بگٹی نے نصیر آباد ڈویژن میں پانی کی شدید قلت پر وزیراعلیٰ سندھ سید مراد علی شاہ سے رابطہ کیا، جس میں آبی صورتحال پر تبادلۂ خیال کیا گیا۔ دونوں وزرائے اعلیٰ نے مشترکہ اقدامات پر اتفاق کرتے ہوئے وزرائے آبپاشی کو فوری طور پر سکھر پہنچنے کی ہدایت دی، جبکہ نصیر آباد ڈویژن کے اراکین اسمبلی بھی اجلاس میں شریک ہوں گے۔

کوئٹہ: وزیراعلیٰ بلوچستان میر سرفراز بگٹی سے پاکستان مسلم لیگ (ن) کے بلوچستان اسمبلی میں پارلیمانی لیڈر میر سلیم خان کھوسہ نے ملاقات کی، جس میں نصیر آباد ڈویژن میں نہروں کے پانی کی شدید قلت اور دیگر عوامی مسائل پر تبادلۂ خیال کیا گیا۔

ملاقات کے دوران میر سلیم خان کھوسہ نے وزیراعلیٰ کو نصیر آباد ڈویژن کی نہروں میں پانی کی شدید کمی سے پیدا ہونے والی صورتحال سے آگاہ کیا اور فوری اقدامات کی ضرورت پر زور دیا۔

ترجمان حکومت بلوچستان اور معاون وزیراعلیٰ برائے اطلاعات و سیاسی امور شاہد رند کے مطابق وزیراعلیٰ میر سرفراز بگٹی نے آبی صورتحال کے پیش نظر وزیراعلیٰ سندھ سید مراد علی شاہ سے ٹیلی فون پر رابطہ کیا، جس میں دونوں رہنماؤں نے بلوچستان اور سندھ کے درمیان پانی کی تقسیم اور آبی مسائل پر تفصیلی تبادلۂ خیال کیا۔

دونوں وزرائے اعلیٰ نے آبی مسائل کے حل اور صورتحال میں بہتری کے لیے مشترکہ اقدامات پر اتفاق کرتے ہوئے دونوں صوبوں کے وزرائے آبپاشی کو فوری طور پر سکھر پہنچنے کی ہدایت جاری کی۔

شاہد رند کے مطابق نصیر آباد ڈویژن سے تعلق رکھنے والے تمام اراکین بلوچستان اسمبلی بھی سکھر میں منعقد ہونے والے آبپاشی سے متعلق اجلاس میں شرکت کریں گے، جہاں پانی کی قلت اور اس کے حل کے لیے آئندہ کے لائحہ عمل پر غور کیا جائے گا۔