بلوچستان میں نوجوانوں کو بااختیار بنانے اور جدید مہارتوں کے فروغ پر زور

سنٹر آف ایکسیلنس کے زیرِ اہتمام کانفرنس میں نوجوانوں کی فنی تربیت، روزگار کے مواقع اور سماجی ہم آہنگی کے فروغ پر زور دیا گیا۔ مقررین نے کہا کہ بلوچستان ایمپلائمنٹ پروگرام اور جدید تربیتی کورسز نوجوانوں کے لیے بہتر مستقبل اور روزگار کے نئے امکانات پیدا کریں گے۔

کوئٹہ: سنٹر آف ایکسیلنس کے زیرِ اہتمام نوجوانوں کو بااختیار بنانے اور سماجی ہم آہنگی کے فروغ کے لیے ایک کانفرنس منعقد کی گئی، جس میں نوجوانوں کی فنی تربیت، روزگار کے مواقع اور جدید مہارتوں کے فروغ پر زور دیا گیا۔

کانفرنس سے خطاب کرتے ہوئے سنٹر آف ایکسیلنس کے چیف کوارڈینیشن آفیسر ڈاکٹر دوست محمد نے کہا کہ صوبائی حکومت نوجوانوں کو جدید فنی تعلیم فراہم کرنے کے لیے مختلف شعبوں میں ڈپلومہ اور تربیتی پروگرام شروع کر رہی ہے۔ انہوں نے بتایا کہ بلیو اکانومی، زراعت، مائنز اینڈ منرلز، قابلِ تجدید توانائی اور دیگر شعبوں میں تربیتی پروگرام متعارف کرائے گئے ہیں، جن سے نوجوانوں کو ہنر سیکھنے اور روزگار کے نئے مواقع حاصل ہوں گے۔

ڈپٹی کوارڈینیشن آفیسر ڈاکٹر عصمت اللہ نے کہا کہ حکومت بلوچستان نے "بلوچستان ایمپلائمنٹ پروگرام" کا آغاز کیا ہے، جس کے تحت مصنوعی ذہانت، فری لانسنگ، ڈیجیٹل مارکیٹنگ، ای کامرس اور دیگر جدید کورسز فراہم کیے جا رہے ہیں۔ انہوں نے کہا کہ یہ پروگرام نوجوانوں کو بااختیار بنانے اور انہیں مثبت سرگرمیوں کی جانب راغب کرنے میں اہم کردار ادا کرے گا۔

کانفرنس کے مقررین نے اس امید کا اظہار کیا کہ اس نوعیت کے پروگرام بلوچستان کے نوجوانوں کی استعداد کار میں اضافہ کرکے روزگار کے مزید مواقع پیدا کرنے میں معاون ثابت ہوں گے۔