بی ایس ڈی آئی پروگرام کے تحت ڈپٹی کمشنر دکی کا ترقیاتی منصوبوں کا معائنہ۔

ڈپٹی کمشنر دکی محمد نعیم خان نے کمانڈر 87 ونگ کرنل شاہد بلال کے ہمراہ بی ایس ڈی آئی پروگرام کے تحت شہر کے مختلف ترقیاتی منصوبوں کا تفصیلی دورہ کیا۔ اس موقع پر انہوں نے متعدد منصوبوں کا معائنہ کیا جن میں مختلف روڈز، ڈرینج سسٹمز، ڈسٹرکٹ ہیڈکوارٹر ہسپتال کا آپریشن تھیٹر، واٹر سپلائی اسکیم کلی حاجی شادی خان مدرسہ، سرکاری رہائش گاہیں اور گورنمنٹ پرائمری اسکول ملا کریم شامل تھے۔
ڈپٹی کمشنر نے منصوبوں کی پیش رفت، معیار، صفائی، بنیادی سہولیات اور مجموعی انتظامات کا جائزہ لیا۔ انہوں نے متعلقہ محکموں کو ہدایت کی کہ تمام ترقیاتی کام مقررہ مدت اور معیاری تقاضوں کے مطابق مکمل کیے جائیں تاکہ عوام کو بہتر سہولیات فراہم کی جا سکیں۔
انہوں نے اس بات پر زور دیا کہ ترقیاتی منصوبوں کی نگرانی مستقل بنیادوں پر جاری رکھی جائے اور تمام کام شفافیت، عوامی مفاد اور اعلیٰ معیار کے اصولوں کے مطابق تکمیل تک پہنچائے جائیں۔